Dalawang linggo nang nakakulong ang overseas Filipino worker
(OFW) na si Hazel Marcelino sa Oman matapos umanong mapagbintangang kasabwat ng mga katrabahong nagnakaw sa amo.

Kuwento ni Marlyn Marcelino, ina ni Hazel, magbibitiw na sana sa trabaho ang kaniyang anak bilang sales and marketing agent sa isang tindahan ng damit sa Oman.

Pero kinasuhan siya ng kaniyang amo sa alegasyong kasabwat si Hazel ng dalawang kasamahang Pinoy na nagnakaw umano ng ilang gamit mula sa amo.

Tumakas sa trabaho ang mga kasamahan ni Hazel.

Nananawagan ngayon ng tulong ang pamilya ni Hazel para malinis ang kaniyang pangalan at makalaya sa kulungan.

May mga ginagawang hakbang na rin ang Overseas Workers Welfare Administration (OWWA) para sa agarang paglutas ng kaso ni Hazel.

-- Ulat ni Zen Hernandez, ABS-CBN News