Iniimbestigahan na ng Department of Health (DOH) ang tatlong bata sa Davao na sinasabing nabakunahan ng Dengvaxia vaccine.

• Out soon: Cards, ballers for Dengvaxia recipients

Noong isang linggo nag-report sa DOH ang mga magulang at guardian ng mga bata.

Dalawa sa kanila, kalilipat lamang sa Davao City.

Ang isang bata, sa Maynila nabigyan ng Dengvaxia habang ang isa naman ay sa Cebu City. Samantala, dalawang beses naman nabakunahan sa isang private clinic sa Davao ngayong taon ang isa sa tatlo.

"Yung dalawa hindi pa nagpapakita sa amin. Kailangan malaman namin ang petsa ng vaccination at kung ilang beses na silang nabakunahan," ani Dr. Annabelle Yumang, assistant regional director ng DOH-Davao.

Inatasan na ni Davao City Mayor Sara Duterte ang City Health Office na imbestigahan at i-monitor ang kondisyon ng mga bata.

Nagpadala na rin ng sulat ang DOH-Davao sa mga pribadong ospital at clinic sa Davao region para malaman kung may nabakunahan silang bata.

Mayroon kasing ibang clinic na nakabili ng dengue vaccine.

Ang Dengvaxia ay parte ng national immunization program ng gobyerno ngunit naipatupad pa lamang ito sa National Capital Region, Central Luzon, Calabarzon, at ilang bahagi ng Visayas.

Sinuspende na ang dengue vaccine program habang nagkakaroon ng imbestigasyon ang Kongreso.

• DOH on alert as Sanofi admits dengue vaccine poses risks

Naging kontrobersiyal ang bakuna matapos sabihin ng manufacturer nitong Sanofi Pasteur na maaaring magdulot ng mas malalang dengue sa mga nabakunahang hindi pa nagkakaroon ng nasabing sakit.

• TIMELINE: The Philippines' dengue vaccine program

--Ulat ni Vina Araneta, ABS-CBN News