MANILA - Binaril ang sasakyan ng close-in security ni Justice Secretary Vitaliano Aguirre habang binabagtas ang South Luzon Expressway (SLEX) Martes.

Taliwas sa unang impormasyong lumutang, nilinaw ni Justice Undersecretary Erickson Balmes na hindi ang bahay ni Aguirre ang binaril kundi ang pribadong sasakyan ni Senior Inspector Recaredo Sarmiento Marasigan, na miyembro ng security detail ni Aguirre.

Ayon kay Marasigan, nagmamaneho siya sa expressway nang maramdaman niya na may tumama sa kanyang sasakyan.

Inakala umano ni Marasigan na may bumato lamang sa kanyang sasakyan, pero pagdating sa bahay ni Aguirre ay napansin niya na may bala sa kaliwang headlight ng kanyang sasakyan.

Pina-blotter naman agad ni Marasigan sa himpilan ng pulisya ang insidente.

Si Aguirre ay kasalukuyang dumadalo sa isang pagtitipon ng mga hukom sa Cagayan de Oro City.