MANILA - Nakuhanan ng marijuana ang isang lalaking dinampot ng mga awtoridad dahil sa pagbebenta ng ninakaw na pusa sa Barangay Santolan, Pasig nitong Martes.

Nitong Sabado, nawala si "Ash", ang pusang Foldex breed na pagmamay-ari ng isang office worker na hiniling na itago ang kanyang pangalan.

Nakita ang pusa na hawak ng 20-anyos na si Guimar Servande nang dumaan ito sa barangay hall noong Linggo, sabi ng tanod na si Jun Torres.

Nang makita ng mga rumorondang tanod si Servande nitong Martes ng gabi, isinama nila siya sa barangay para tanungin.

Doon umano niya inamin na ibinenta n'ya at ng ilang kasamahan ang pusa sa halagang P250 sa isang residente ng kabilang barangay.

Pinuntahan ng may-ari at ng barangay ang naturang residente na kinumpirmang si Servande ang nagbenta kay Ash.

Nagkaroon ng mga rash sa katawan ang pusa nang mabawi siya. Sinabi ng kanyang may-ari, P20,000 ang bili niya sa dalawang-taong-gulang na si Ash.

Nagkaroon ng mga rash ang Foldex cat na si Ash nang maibalik siya sa may-ari niyang office worker pic.twitter.com/8GH6cQcokD

— Anjo Bagaoisan (@anjo_bagaoisan) September 26, 2017

Ayon naman sa barangay, may mga kasamahan si Servande na sangkot sa ibang kaso ng nakawan sa lugar.

Nakuha naman ang 4 na pakete ng hinihinalang marijuna sa shorts ni Servande habang nasa barangay hall ito.

Ikinagulat ito ng kinakasama ni Servande, na tumangging gumagamit o nagbebenta ang droga ang lalaki.

Posibleng maharap si Servande sa kasong paglabag sa Dangerous Drugs Act. Ulat ni Anjo Bagaoisan, ABS-CBN News