Inihanda na ng pulisya ng Albuera ang isang kwarto kung saan mananatili si Mayor Rolando Espinosa Sr.

Simula Huwebes, sa Albuera Police Station na mag-oopisina si Espinosa bilang bahagi ng protective custody para sa kaniya habang wala pa ang warrant of arrest sa mga kaso nito.

Ayon kay C/Insp. Jovie Espenido, hepe ng Albuera Police, ang kanilang investigation room ang gagawing kwarto ni Espinosa.

Sa loob, mayroon itong isang mesa at upuan. Limitado lang din ang papayagang bumisita sa alkalde, ngunit kung may mga dapat na pirmahan si Espinosa bilang mayor, dito niya ito gagawin.

Ang magiging kwarto ni Espinosa ay katabi lamang sa opisina ng Chief of Police.

Kahapon ay pumirma na ng affidavit si Espinosa kung saan nakasalaysay ang mga koneksiyon at mga protektor ng kanilang transaksiyon sa illigal ng droga.