COTABATO CITY – Natagpuan sa loob ng isang bahay sa Purok Sampalok Manday sa Cotabato City ang isang bala ng 81mm mortar na pinaniniwalaang iniwan bilang panakot sa mga residente.

Ayon kay Barangay Chairman Ella Biruar, dinala ng mga residente ang bala sa barangay hall ng Mother Barangay Bagua, Cotabato City pasado alas-5 ng hapon ng Martes.

Inaalam ngayon ng Philippine National Police kung sino ang posibleng nag-iwan ng mortar sa loob ng isang bahay at kung ano ang motibo nito, ngunit kanilang hinala na posibleng pananakot lamang ito dahil walang nakakabit na trigger device sa bala upang ito ay pasabugin.

Ang bala ng mortar ay ibinigay na ng mga opisyal ng barangay sa PNP at Explosive Ordnance Disposal Team.