MAYNILA — Patay ang isang driver nang maaksidente ang minamaneho niyang truck na may dalang concrete girder sa Quezon City noong gabi ng Sabado.

Tila nayuping lata ang harapan ng truck matapos bagsakan ng mismong kargang concrete girder.

May bigat na 40 tonelada ang concrete girder, na ginagamit sa mga column ng tinatapos na Skyway Stage 3 project.

Ayon kay Don Michael Bayangos, search and rescue operations supervisor ng Quezon City disaster office, bandang alas-11 nang makarating sila sa accident site sa may E. Rodriguez Avenue para subukang iligtas ang driver pero hindi na ito rumeresponde.

Kalaunan ay binawian umano ng buhay ang driver pero nagpatuloy ang retrieval, na inabot nang halos 3 oras.

Watch more in iWantv or TFC.tv

Base sa imbestigasyon nila Bayangos, patungo ang truck sa Skyway Stage 3 project sa Sgt. Rivera Street at may iniwasang sasakyan kaya naapakan ang preno.

Pero dahil sa sobrang bigat ng kargang concrete girder, dumulas umano ito paabante at natulak ang tractor head kung nasaan ang driver.

Hindi naging madali ang pagligtas sa driver at kinailangan pa ng mga hydraulic-powered na gamit tulad ng spreader at cutter.

Kinailangan din umanong maiangat ang tone-toneladang konkreto sa ibabaw ng truck.

Tumanggi munang magbigay ng pahayag ang pamunuan ng trucking company.

Bandang alas-4 ng madaling araw nitong Linggo nang mailipat sa ibang truck ang concrete girder at muling naging normal ang daloy ng trapiko. -- Ulat ni Kevin Manalo, ABS-CBN News