Pulis sa viral video na nanampal ng bus driver, sumuko sa NCRPO. Tinanggal na siya sa Parañaque PNP at inilipat sa Regional Headquarters Support Group ng NCRPO. (📸: NCRPO) | via @zhandercayabyab pic.twitter.com/gI6ZguceH8

— DZMM TeleRadyo (@DZMMTeleRadyo) July 26, 2018

MAYNILA - Humarap na sa National Capital Region Police Office ngayong Huwebes ang pulis na nag-viral sa social media matapos makunan ng bidyong nanampal ng isang bus driver.

Ayon sa nag-upload ng video sa Facebook na si Joel Ontong, nangyari ang insidente Miyerkoles ng gabi sa may Simbahan ng Baclaran.

PANOORIN: Viral video ng pulis na nanampal ng bus driver sa Baclaran Church sa Parañaque nitong Miyerkoles. (📹: Joel Ontong) pic.twitter.com/mY1pR5z38o | via @zhandercayabyab

— DZMM TeleRadyo (@DZMMTeleRadyo) July 26, 2018

Giit ni PO1 Edmar Costo, na mula sa presinto uno sa Parañaque, nainsulto siya kaya niya nagawang sampalin ang driver ng Valisno Express bus.

Kuwento ng bagitong pulis, sinita niya dahil sa reckless driving ang tsuper. Pero sinabihan umano siya ng kundoktor na bibigyan na lang siya ng P100 pang-areglo.

Dagdag pa ni Costo, nang kinukuha na niya ang lisensiya sa driver, hindi ito pumayag agad at iwinawasiwas pa umano ang ID. Pagbigay umano ng lisensiya, may nakaipit nang pera rito.

Ayon sa pulis, pera na ipinang-aareglo sa kanya ang isinampal niya sa driver. Sa kasagsagan ng kanilang diskusyon, dalawang beses sinampal ng pulis ang tsuper.

Watch more in iWantv or TFC.tv

Sa kabila ng paliwanag, tinanggal si Costo sa puwesto at inilipat muna sa Regional Headquarters Support Group ng NCRPO.

Hinahanap na ng pulisya ang driver ng bus para pormal na maihain ang kasong administratibong simple misconduct at kasong kriminal na slight physical injury laban sa pulis.