Ipinatatapon sa Marawi ang dalawang pulis na sangkot sa pambubugbog ng dalawang lalaki sa Mandaluyong.

Nakuhanan pa ng isa sa mga biktima ng video ang aktuwal na pambubugbog at viral din ito sa social media.

Ayon sa kumuha ng video, inimbitahan sila sa presinto ni PO1 Jose Tandog at kasamahang si PO1 Chito Enriquez matapos silang mahuli na umiinom sa kalye.

Makikita sa video na naging mahaba ang kanilang diskusyon pero hindi nagtagal, pinagpapalo na ng hawak na kahoy ni Tandog ang mga biktima.

Sinubukan pang mangatuwiran ng mga lalaki pero tuloy pa rin ang hataw ng pulis at nanakot pa na papuputukan sila ng baril.

Kinompronta rin ni National Capital Region Police Office (NCRPO) chief Director Oscar Albayalde si Enriquez dahil bagama't hindi siya namalo, may pananagutan pa rin siya at dapat aniya ay inawat niya ang kasamang pulis.

Depensa naman ni Enriquez, nagulat rin siya sa inasta ni Tandog.

Ayon pa kay Albayalde, ipinag-utos na ni Philippine National Police chief Director General Ronald "Bato" dela Rosa na sibakin sa puwesto ang dalawang pulis, at ipatapon sa Marawi habang iniimbestigahan ang kanilang kaso.

-- Ulat ni Jeck Batallones, ABS-CBN News