BRP Batangas na may dalang 10,000 relief packs, nakaalis na ng Maynila at patungong Iligan; BRP Pampanga, tutulak din sa lugar |@RonLopezPH pic.twitter.com/0J1hgmoxBu

— DZMM TeleRadyo (@DZMMTeleRadyo) May 24, 2017

Tumulak Huwebes ng umaga ang isang barko ng Philippine Coast Guard papuntang Port of Iligan sa Mindanao, para magbigay ng relief goods sa mga residenteng apektado ng bakbakan sa pagitan ng mga teroristang grupo at pwersa ng gobyerno.

Pumutok ang engkuwentro Martes nang kubkubin ng bandidong grupo na Abu Sayyaf at Maute ang ilang gusali sa Marawi City, Lanao del Sur.

Kasabay ng paghupa ng bakbakan nitong Miyerkules, nagsimulang lumikas ang mga residente mula sa Marawi patungo sa mga karatig-lungsod ng Cagayan de Oro at Iligan.

Ayon kay PCG spokesman Commander Armand Balilo, 3 truck o 10,000 relief packs mula sa Department of Social Welfare and Development ang lulan ng BRP Batangas na patungong Mindanao.

TINGNAN: Lulan ng BRP Batangas ang 3 truck ng relief goods mula sa DSWD | via @biancadava pic.twitter.com/lLQX35q8Dl

— DZMM TeleRadyo (@DZMMTeleRadyo) May 24, 2017

Laman ng bawat food pack ang 5 kilo ng bigas, 8 de lata at isang pack ng kape.

@biancadava Laman ng bawat relief pack ang 6 kilong bigas, 8 delata at 1 pack ng kape. Mayroon ding hygiene kits, kumot at banig pic.twitter.com/FLeiWLJXUc

— DZMM TeleRadyo (@DZMMTeleRadyo) May 24, 2017

Dagdag ni Balilo, may dala rin ang ang barko na non-food items gaya ng hygiene kits, mga banig at kumot para sa mga lumikas o nananatili sa mga evacuation centers.

Aabutin ng 18 oras ang biyahe ng barko.

Pagdating sa Iligan, magsisilbi ang BRP Batangas bilang floating hospital para sa mga residente habang tutulong naman sa maritime security ang ilang sakay nitong PCG officers.

TINGNAN: Barko ng PCG na maghahatid ng relief goods sa mga apektado ng #MarawiClash, tutulak mamayang madaling araw pic.twitter.com/eOSrkagiGb

— DZMM TeleRadyo (@DZMMTeleRadyo) May 24, 2017

Una nang tumulak sa Mindanao Miyerkules ang BRP Malabrigo, lulan ang mga tropa ng PCG na tutulong sa operational security sa Mindanao na isinailalim na sa batas militar.

Muling pinaalala ng pamahalaan na maaaring tumuloy ang mga nagsilikas na pamilya sa mga sumusunod na lugar:

- Lanao del Sur provincial capitol sa Buadi Sacayo, Marawi City;
- Poblacion barangay hall sa Saguiaran, Lanao del Sur;
- School of Fisheries sa Buru-un, Iligan City sa Lanao del Norte; at
- Daycare Center sa Barangay Pacalundo, Baloi sa Lanao del Norte.

-- May ulat ni Bianca Dava, ABS-CBN News