Watch more in iWantv or TFC.tv

Ipinagtanggol ng Grab Philippines ang kanilang singil sa pasahe na P2 kada minuto sa pagdinig sa Land Transportation Franchising and Regulatory Board (LTFRB) nitong Martes.

Grab PH country manager Brian Cu and the TNC’s legal counsels face LTFRB board to explain Cong Jericho Nograles’ allegation that they are illegaly charging their riders P2/min. pic.twitter.com/iuO2xTtFVA

— Jacque Manabat (@jacquemanabat) April 17, 2018

Ayon kay Grab Philippines Country Head Brian Cu, kinailangan nilang ipataw ang dagdag singil para maitama ang kinikita ng kanilang mga drayber.

"What the time element allowed us to do was one, normalize driver's income, which is the main purpose of what we tried to do, para po itama 'yung kinikita nila sa biyahe na ginagawa nila, " ani Cu.

Pinanghahawakan din umano ng kompanya ang orihinal na department order ng dating Department of Transportation and Communications (DOTC) na nagsasabing ang transport network companies (TNC) ang magtatakda ng kanilang pasahe.

Maaari lang umanong makialam ang LTFRB kung may emergency o may abuso na.

Ngunit ayon kay LTFRB Chairman Martin Delgra, hindi nakarating sa kanilang ahensiya ang desisyon ng Grab.

“I have to admit na hindi nila pinaalam kung kelan sila nag-impose. As I've mentioned earlier, medyo liberal 'yung treatment pagdating sa pamasahe sa TNVS (transport network vehicle service)," sabi ni Delgra.

Naniniwala naman si PBA party-list Rep. Jericho Nograles na kailangang ibalik ng mga drayber ng Grab ang karagdagang singil.

• Solon claims Grab owes riders P1.8 billion for 'illegal' charges

“Balik po natin doon sa sa calculation na ginawa ko. Ang tingin ko po, umabot na po ng P3.2 billion 'yung kanilang nakolekta," ani Nograles.

Tinutulan naman ito ng drayber na si Vince Fernandez na pinalabas sa naturang pagdinig dahil sa pagsigaw kay Nograles.

Giit niya, hindi nila kakayanin kung ipababalik sa kanila ang hinihingi ni Nograles.

“'Di kami pabor du'n siyempre. Wala siyang alam, sa totoo lang, wala siyang alam, nagpapasikat lang 'yan," sabi ni Fernandez.

Dahil hindi nakumbinsi ang LTFRB sa mga isinagot ng Grab, ni-reset sa Mayo ang pagdinig.

Nakatakda namang aprubahan ng LTFRB ang bagong transport network company na gawang Pinoy, ang Hype.

Posible rin na makapag-operate na ito ngayong linggo.

Samantala, tumigil na ang operasyon ng Uber sa bansa simula Lunes.

Kontra ito sa utos ng Philippine Competition Commission (PCC) na ituloy ang biyahe nila habang pinag-aaralan ang naganap na merger ng Grab at Uber.

• PCC tells Grab and Uber to explain Uber's shut down

Pagmumultahin ang Uber ng P50,000 hanggang P2 milyon kada araw na hindi nila sinunod ang utos ng PCC.

--Ulat ni Jacque Manabat, ABS-CBN News