Watch more in iWantv or TFC.tv

Binigyan ng Department of Labor and Employment (DOLE) nitong Lunes ang isang kompanya sa Japan ng "go signal" sa pagkuha ng 1,000 manggagawang Pinoy para sa kanilang in-flight catering service.

Ito ang trabaho ng mga nagbibigay ng pagkain sa mga tren sa Japan.

Ayon kay Labor Secretary Silvestre Bello III, prayoridad ng kompanya na mabigyan ng trabaho ang mga overseas Filipino worker (OFW) na na-repatriate o umuwi mula Kuwait.

Dagdag pa ni Bello, karamihan sa mga umuwi mula sa Kuwait ay mga household service worker na may kakayahan sa pagluluto at paglilinis na angkop sa job order.

Ayon naman kay Philippine Overseas Employment Administration (POEA) Administrator Bernardo Olalia, makikipag-ugnayan sila sa Technical Education and Skills Development Authority (TESDA) para isama ang naturang trabaho sa listahan ng skills na pasok sa technical internship training program.

"Ito iyong deployment process natin under the Japanese and Philippine agreement with the assistance ng ating mga agencies," sabi ni Olalia.

Isasangguni ng POEA ang mga pinauwing OFW mula Kuwait sa mga agency na may hawak ng job order mula Japan.

Payo ng POEA sa mga interestado ay paghandaan ang mga rekisito.

Mas mainam kung may TESDA certificate sa food preparation para mas madaling matanggap.

Magsisimula ang recruitment ng Japan sa susunod na dalawang buwan.

-- Ulat ni Zen Hernandez, ABS-CBN News