TINGNAN: Lolo, edad 91, nakitang gumagala sa Mandaluyong kahapon na may dalang mahigit P1.5M halagang salapi sa mga bulsa | @anjo_bagaoisan pic.twitter.com/2D1V8AJOQt

— DZMM TeleRadyo (@DZMMTeleRadyo) February 27, 2017

MANILA - Naibalik na sa kanyang kaanak ang isang 91-anyos na lolo na natagpuang naglalakad habang may dalang P1.5 milyon sa EDSA, Mandaluyong City Lunes.

Ayon sa police report, nakita ng mga nagrorondang pulis at opisyal na Barangay Barangka Ilaya na pinagkakaguluhan ng ilang tao ang lolo sa EDSA bandang alas-5:30 ng hapon.

Nang lapitan, nakita nilang may dalang mga salaping piso at dolyar ang lolo. Hawak niya ang ilan habang ang iba ay nasa bulsa ng kanyang pantalon.

Dinala nila ang lolo sa barangay hall para makuha ang pagkakakilanlan niya at mabilang ang dala niyang pera.

Natala nila ang halos 300 piraso ng dollar bills na nagkakahalaga ng P1.3 milyon at peso billa na aabot sa P276,000.

Ipinaliwanag ng matanda sa mga awtoridad na tataya dapat siya sa sabong, pero hindi magkakatugma ang ilang bahagi ng kanyang kwento.

Sa pamamagitan ng nakuhang lisensya at senior citizen ID, na-contact ng mga opisyal ang isang anak ng matanda sa Pasig.

Hindi niya nakilala ang anak nang iharap ito sa kanya.

Pero may dinalang patunay ang anak na mag-ama sila kaya itinurn-over sa kanya ng mga pulis ang matanda.

Nakiusap ang pamilya na huwag ilabas ang pagkakakilanlan ng lolo.