Hindi natuloy ang paglilipat sa custodial center ng Philippine National Police (PNP) sa Camp Crame sa customs fixer na si Mark Taguba.

Ayon sa National Bureau of Investigation (NBI), hindi tinanggap ng custodial center si Taguba dahil sa umano'y isang memorandum circular ng PNP.

Hindi pa klaro sa ngayon kung ano ang nilalaman ng nasabing circular at kung ano ang basehan ng custodial center para tanggihan si Taguba.

Dahil dito, napilitan ang NBI na ibalik na lang muna si Taguba sa kanilang detention facility sa NBI headquarters sa Maynila.

Nauna nang iniutos ng Manila Regional Trial Court RTC Branch 46 ang paglilipat kay Taguba sa PNP Custodial Center matapos nitong paboran ang apela ni Taguba na huwag siyang mailipat sa Manila City Jail dahil sa umano'y banta sa kaniyang buhay.

Si Taguba ang isa sa mga suspek sa pagpasok sa bansa ng P6.4 bilyon na halaga ng shabu mula sa China.