Bilang paghahanda sa inaasahang strike ng mga jeepney operator sa Lunes ay makakasakay ng libre ang mga pasahero sa ilang sasakyang pagmamay-ari ng pamahalaan.

Libre ang pasahe sa mga bus na pagmamay-ari ng gobyerno, at sa mga 6x6 na trak na papasada habang naka-strike ang mga pampasaherong jeep, sabi ng Joint Quick Response Team (JQRT) ng pamahalaan.

Sa mga pribadong bus naman ay kailangan pa ring magbayad ng mga pasahero para makasakay.

Ayon sa Department of Transportation at Land Transportation Franchising and Regulatory Board (LTFRB), aabot sa 4,800 na sundalo, pulis, at mga di-unipormadong opisyal o empleyado ng DOTr, LTFRB, Coast Guard, Metro Manila Development Authority, Department of Public Works and Highways, at Office of Transportation Security ang mamamahala sa trapiko sa araw na iyon.

Magsasagawa ng malawakang tigil-pasada ang mga kooperatiba ng tsuper at operator ng jeep sa Lunes bilang pagtutol sa plano ng pamahalaan na tanggalin o i-phaseout ang mga lumang jeep sa kalye.

• PANOORIN: Mga jeepney driver, tigil-pasada sa Lunes