Naalarma ang Provincial Agriculture Office ng Pangasinan dahil sa pag-atake ng pesteng uod na harabas sa kanilang pananim.

Isa si Leopoldo Baroga sa napinsala ang tanim na sibuyas dahil sa peste.

“Naubos. Kahit anong fungicide ang ilagay wala magagawa,” sabi niya.

Nagtanim na lamang si Baroga ng tabako para kahit papaano ay makabawi.

Tinatayang 1,000 ektarya ang natamnan ng sibuyas sa Pangasinan at 30-ektarya pa lang ang naitatalang apektado kasama dito ang ilang parte ng Alcala, Bautista, Malasiqui at Bayambang.

“Medyo grabe yung ibang parte.. Alarming, may mga farmers na wala nang nakukuha,” paliwanag ni Assistant Agriculturist Nestor Batalla.

Ayon sa tanggapan, posibleng dahil din sa galing sa ibang tanim ang pag-dami ng army worms.

“May mga parte na doon lalo sa area na may tirahan yung army worm, yung mga nagtatanim ng kamote, dun sila nakatira pag hinarvest na yung kamote, lalabas na sila pupunta na sila sa pwede nilang kainin,” dagdag ni Batalla.

Patuloy ang isinasagawang monitoring ng Agriculture Office sa mga apektadong lugar habang pinapayuhan din ang mga magsasaka na agad mag-report kung may makitang peste sa kanilang taniman.