MANILA -- Isang taon ng namamayagpag ang panghapong teleserye na "Doble Kara" na pinagbibidahan ni Julia Montes.

Nagpa-set visit ang nangungunang panghapong programa at naibahagi ni Julia na mahaba pa ang itatakbo ng kwento ng kambal na sila Kara at Sara.

"Naku marami pa po kasi even kami nasha-shock kapag nagbabasa kami ng script 'grabe no, grabe no.' So marami pa po at marami pang kwento ang papasok," ani Julia.

Kung personal naman na buhay ni Julia ang tatanungin, si Coco Martin pa din ang pinakamalapit sa kanya.

"Kung ako din naman 'yung tatanungin si Coco din naman 'yung pinaka-close ko at talagang lagi ko ding sinasabi kahit (balikan) pa natin ang interviews sa kanya ako kampante," ani Julia.

Ibinahagi pa ni Julia na kahit malaki ang age gap nila ni Coco ay nagkakaintindihan sila at masaya kapag magkasama.

"Ako sa friends, sa lahat mas okay ako sa mas older, kasi mas gusto ko 'yung mas may natutunan ako, hindi 'yung explore, explore then after wala lang," dagdag ng aktres.

Kahit busy sa "Doble Kara" ay bukas din si Julia sa paggawa ng pelikula na hahamon sa kanyang talento so pag-arte.