Hindi pa rin maipaliwanag ang nararamdamang saya ng "Alempoy" tandem nina Alessandra de Rossi at Empoy Marquez dahil P230 million na ang kinita sa box office ng una nilang tambalan na "Kita Kita."

Big reveal ng "Alempoy," masusundan pa ito ng isa pang pelikula.

"Ayaw mo ng superhero?" tanong ni Empoy.

"Siyempre ang gusto ko 'yung pang best actor mo sa Oscars!" ani Alessandra.

Suggestion ni Alessandra, heavy drama naman ang next movie nila ni Empoy.

"Heavy drama naman po tayo. Gusto ko umiyak si Empoy, hagulgol, walling, ganon," ani Alessandra.

"Siguro kung may follow-up baka mag-expect na sila magkatuluyan kami ni Empoy," dagdag niya.

Nang matanong kung may posibilidad ito, sagot ni Alessandra: "Zero!"

One liner naman ang reaction ni Empoy sa bansag sa kanya na "The New Pogi."

"Acceptance is real eh!" ani Empoy.

Malaking bonus ang ibinigay sa kanila ng kanilang producer na si Piolo Pascual kaya't malaki ang pasasalamat nina Alessandra at Empoy na nasanay sa supporting roles at small-budget movies.

"Nung sinabi ngang may bonus 'yung natulala muna ako ng kaunti, tapos, 'Do I deserve it?'" ani Alessandra.

"Para sa future po at sa family," ani Empoy.

Palabas pa rin ngayon ang "Kita Kita" at naghahanda na sa international screening kasama ang tambalang "Alempoy."