MANILA -- Abot tainga ang ngiti ng tinaguriang "King of Philippine TV" na si Coco Martin nang ipakilala ang kanyang bagong leading lady na si Mariel de Leon.

Anak si Mariel ng batikang aktor na si Christopher de Leon at Sandy Andolong. Siya rin ang kasalukuyang may hawak ng korona bilang Binibining Pilipinas International.

• BASAHIN: Mariel de Leon, may balak pumasok sa showbiz?

Nitong Martes ng gabi, kasama ang ABS-CBN News sa mga piling media organization na inanyayahang makasali sa story conference ng Metro Manila Film Festival 2017 entry na "Ang Panday."

Si Coco, na siyang tumatayong bida at direktor ng pelikula, ang mismong naglahad ng plot ng adaptation nila sa obra ng Philippine icon na si Carlo J. Caparas.

Bagama't halatang pagod, kitang-kita ang excitement sa mga mata ni Coco, lalo na nang ipakilala na ang kanyang magiging leading lady. Unang kita pa lang daw ni Coco kay Mariel ay alam na niyang siya ang bagay para sa role.

"Basta parang isang araw nakita ko siya sa TV, napanood ko, tapos parang alam ko nang siya 'yong pipiliin ko. Pinatawagan ko agad siya," ani Coco.

Ayon pa kay Coco, ipinagpaalam niyang maigi sa mga magulang ni Mariel ang magiging role nito. Happy naman siya at suportado ng mag-asawa ang showbiz career ng kanilang anak. "Pinapangako ko na talagang aalagaan ko siya," dagdag niya.

Samantala, medyo pressured si Mariel dahil ito ang kanyang magiging unang major role sa isang pelikula. Kaya naman talagang puspusan ang kanyang paghahanda.

"I want to study my character more, and of course, ask my parents for more advice and what I can do in terms of acting. And maybe I'll take workshops na rin and improve my Tagalog," paglalahad niya.

Nang tanungin kung may kissing scene sila sa pelikula, napailing nalang si Coco at tumawa. Pero open naman daw si Mariel basta hindi lalampas sa halik ang ipagagawa sa kanya.

"A kissing scene is fine, but more than that, that's my limitation," ani Mariel.