Pinoy nurses, hirap sa English proficiency exam

ABS-CBN News

Posted at Oct 18 2017 12:56 AM | Updated as of Oct 18 2017 02:36 PM

Watch also in iWantv or TFC.tv

Maraming bakanteng trabaho para sa mga nurse sa United Kingdom (UK), pero maraming Pilipino na nars ang hindi makalusot dahil hirap umano pumasa sa isang pagsusulit ng wikang Ingles.

Sa ulat ng diyaryong The Times sa UK, 52 mula sa 59 na nars mula sa Pilipinas na kinuha ng Medway Maritime Hospital sa Kent ay bumagsak sa International English Language Testing System (IELTS).

Patakaran ng mga bansang hindi sakop ng European Union gaya ng UK na dapat magtamo ang mga banyagang manggagawa ng band score na 7 sa bawat kategorya ng IELTS.

Hirap umano ang mga Pilipino na abutin ang itinakdang band score.

Ang ilang health care professional sa UK, umamin na dalawang beses silang kumuha ng IELTS.

"Sa atin kasi we are not really focused on writing essays, doing the reading all the time. More on skills tayo sa Pilipinas eh, more on practical skills when they teach nursing," ani Ela Hidalgo, isang health care assistant.

Ayon sa isang ahensiyang kumukuha ng mga nars, sa writing exam bumabagsak ang mga Pilipino.

"According to client feedback, the most common problem that Filipino nurses are experiencing is actually not being able to achieve the required band score," ani Geophel Cajulis, isang recruitment manager.

Pero gusto raw talaga ng mga Briton ang kalidad ng trabaho ng mga Pilipino.

Ayon sa NHS Digital, na nagbibigay ng datos tungkol sa health care sa UK, kulang ang mga manggagawa ng National Health Service sa kanilang bansa.

Sa katunayan, mga nars at komadrona ang may pinakamalaking bakante noong Marso 2017, na pumalo hanggang 11,000.
 
Sa paglakas ng UK sa EU, inaasahang mas dadami pa ang bilang nga mga bakanteng trabaho para sa mga nars. 

-- Ulat ni Rose Eclarinal at Marco Pajo, ABS-CBN News

Bisitahin ang Patrol.PH para sa iba pang mga balita.