120 naospital sa Siargao dahil sa diarrhea bunsod ng Bagyong Odette

MAYNILA (UPDATE) — Nasa 120 tao ang naospital dahil sa diarrhea sa Siargao Island, Surigao del Norte matapos ang pananalasa ng Bagyong Odette.

May 7 tao na ring nasawi matapos tamaan ng diarrhea. 

Ayon kay Surigao del Norte Gov. Francisco "Lalo" Matugas, kasalukuyang puno ng mga pasyente ang Siargao District Hospital.

"May namatay na dahil sa diarrhea. 'Yung hospital puno na ang district hospital. Mga 120 patients na doon," aniya sa panayam sa TeleRadyo Biyernes.

• PH faces 'major humanitarian crisis' in Typhoon Odette aftermath

Ayon sa gobernador, pahirapan pa rin ang makukuhanan ng malinis at maiinom na tubig sa isla.

Wala pa ring kuryente sa Siargao kaya hindi pa naibabalik ang operasyon ng lahat ng water-refilling stations. Limitado rin aniya ang mga barko at eroplano na naghahatid ng relief goods.

"'Yung tubig isa 'yun sa pinakaproblema, kasi... mga bata nagka-diarrhea," ani Matugas.

"As of now, 'yung iba umiinom lang kung saan-saan," dagdag niya.

• Paghahanap ng tubig hamon pa rin sa mga taga-Cebu City dahil sa Odette

Umaapela ng tulong ang opisyal at partikular na hinihiling niya ay generator sets. 

Nasa 25 tao ang nasawi sa Surigao del Norte, kabilang ang 18 tao sa Siargao.

• Mga nasalanta ng Bagyong Odette sa Surigao del Norte, namamalimos na