Quarantine bureau kailangan ng dagdag na tauhan bago mag-Pasko

MAYNILA—Humihingi ang Bureau of Quarantine ng dagdag na tauhan para bantayan ang mga papasok ng bansa ngayong Pasko sa kabila ng banta ng Omicron COVID-19 variant.

Ayon kay Dr. Neptali Labasan, senior quarantine officer ng BOQ, mas magiging malawak ang kanilang pagmo-monitor sa darating sa bansa.

"Medyo 'yung personnel namin ay kulang. Parati po nating nirerequest po sa kanila sana naman ay dagdagan," aniya sa panayam sa TeleRadyo Biyernes.

"'Pag may tinamaan po sa hanay po natin, hindi pupuwedeng mapilit na pumasok 'yun dahil talagang naka-quarantine po sila. Wala hong papalit sa kanila."

Sinabi ni Labasan na nakararanas na ng fatigue ang mga tauhan sa BOQ dahil magda-dalawang taon na itong nakabantay sa mga port at airport laban sa COVID-19. Ito'y kahit aniya tinutulungan na sila ng ibang ahensiya.

• Higit 60 Pinoy mula red list countries minomonitor ng Bureau of Quarantine

Dahil sa banta ng Omicron variant, nasa 64 katao ang binabantayan ng BOQ na galing sa red-list countries.

"So far, wala pang nagpapakita ng sintomas ng COVID sa kanila," ani Labasan.