PatrolPH

Mga kaanak ng namatay sa pananaksak sa QC school, nanawagan ng hustisya

ABS-CBN News

Posted at Nov 30 2022 07:37 AM | Updated as of Nov 30 2022 08:58 AM

Watch more on iWantTFC

MAYNILA—Mabait at malambing na bata- ganyan kung ilarawan ng mga kaanak ang biktima ng pananaksak sa harap ng isang paaralan sa Brgy. Pag-asa, Quezon City.

Lubos ang kanilang pagdadalamhati sa sinapit ng 18 taong gulang na lalaking namatay matapos isugod sa ospital kagabi.

Ayon kay Melva De Villa, tiyahin ng biktima, nakakatulong na sa pamilya ang kanilang pamangkin. Wala rin silang nababalitaang kaaway nito kaya nabigla sila sa pangyayari.

Kwento naman ng tiyuhin ng biktima na si Christopher Aguila, ang kapatid pa niya na nasa probinsya ang naghatid sa kanila ng masamang balita matapos makita ang larawan ng bata sa social media.

Kaya ang kanilang panawagan: hustisya para sa kanilang kaanak.

"Sobrang sakit dahil unang una napakabait na bata nyan saka hindi siya yung palaaway na tipo ng bata. Ang panawagan ko po ay mabigyan ng hustisya yung pamangkin ko. Kasi hindi niya po deserve yan. Bata pa po e saka nakakatulong na siya sa mga magulang niya. Ang sakit po," ani De Villa.

"Kung ako tatanungin talagang di ko lubos maisip, masakit para sa amjn ... Ang pinakada-best ay managot kung sino man ang gumawa nun kasi hindi hayop ang pamangkin ko para ganunin lang, kung anuman ang dahilan," ani Aguila.

Sa ngayon, ang dalawa pang biktima na kaanak din ng namatay ay ginagamot sa Quezon City General Hospital.

Umaasa naman ang kanilang pamilya na mapabilis ang imbestigasyon at managot ang mga tao sa likod ng pagpatay na ito.—Ulat ni Karen De Guzman, ABS-CBN News

Bisitahin ang Patrol.PH para sa iba pang mga balita.