9 na kolehiyo, unibersidad sa Cebu City maaari nang mag-face-to-face classes

ABS-CBN News

Posted at Nov 26 2021 08:42 AM

Watch more on iWantTFC

MANILA—Siyam na kolehiyo at unibersidad sa Cebu City ang pinayagan na ng Emergency Operations Center ng lungsod na magsagawa na ng limitadong face-to-face classes para sa ilang mga kursong inaalok nito, ayon sa alkalde Biyernes.

Ang mga eskwelahang pinayagang magbukas ay:

  • Cebu Normal University (Nursing)
  • Matias H. Aznar Memorial College of Medicine (School of Medicine)
  • School of Midwifery
  • St. Paul College (Nursing and Midwifery)
  • SWU-Phinma (Nursing, Medical Technology, Physical Therapy)
  • University of Cebu – Banilad Campus (Nursing, Medical Technology, Midwifery)
  • University of Cebu – METC (Nautical and Maritime Engineering)
  • University of San Carlos Talamban Campus (Nursing)
  • Velez College (Physical Therapy)

Sa isang panayam sa TeleRadyo, sinabi ni Mayor Michael Rama na kailangan pa ring sundin ang minimum public health standards.

“ ’Yung palaging ’yung sinasabi ko ’yung ‘WUHAN’, dapat hindi kinakalimutan ’yon — wash your hands, use your face mask, have your temperature checked, avoid crowded places, never touch your face, mouth, eyes, nose I-commit to memory ‘yan,” ani Rama.

Importante ring bakunado na ang mga estudyante.

“Kasama ’yan, kasi ’yung lahat ng mga teachers naman fully bakunado. ’Yung mga non-teaching, fully bakunado. Dapat na lang we see to it kasi ’yung mga coverage naman ng [12 to 17] hindi pa natatapos natin. Pero pataas, we already have a substantial number of students that has already been vaccinated,” saad ni Rama.

Ayon kay Rama, mas mababa na sa 1 porsiyento ang COVID-19 positivity rate sa lungsod ng Cebu batay sa pinakahuli nilang datos. — TeleRadyo, 26 November 2021