Sana All: Salon owner maagang nag-abot ng 13th month pay sa staff

ABS-CBN News

Posted at Nov 12 2021 03:50 PM

Watch more on iWantTFC

MAYNILA - Maraming napa-‘sana all’ sa maagang pamasko ng salon owner sa Las Piñas na si Adarna Grande sa 5 niyang tauhan.

Tig-P30,000 ang inabot niya sa kanila noong simula ng Nobyembre bilang kanilang 13th month pay. 

May pangako pa siyang bonus sa kanila pagdating ng Disyembre.

Kuwento ni Grande, pasasalamat at pampaengganyo niya ito sa mga empleyado ng kanyang home-based salon lalo’t tuloy-tuloy ang pasok ng kita sa kanyang negosyo sa gitna ng pandemya.

"Talagang napaka-hardworking sila pagdating sa trabaho at ginagampanan nila lahat ng mga trabaho nila dito sa aking salon. Kaya naman naisipan kong ibigay nang maaga para sipagan sila lalo kasi peak season na at mas parami nang parami ang aming mga kliyente," sabi ni Grande. 

Naging in-demand kasi ang pagpapa-rebond at pagpapakulay na home service sa kabila ng pagpapasara sa mga salon dahil sa lockdown. 

Kinuha niya noon para tumulong sa dami ng kliyente ang mga naging empleyado niya.

At kahit isang buwan pa lang nakabukas ang kanilang salon site sa bahay, hindi sila nauubusan ng kliyente.

Sa katunayan, fully booked na sila hanggang katapusan ng taon.

"Hindi nila mafi-feel sa akin na boss ako, talagang isang pamilya kaming nagtutulungan. Hindi lang ako ang umaangat, pati na rin sila inaangat ko. Sa panahon ng pandemic, tayo-tayo lang naman ang magtutulungan at magkakasama tayo sa pag-angat," sabi niya.

Para kay Grande, paraan ito na hindi lang siya ang umaangat bilang negosyante kundi pati mga nagtatrabaho sa kanya.

Ilan sa mga nabili ng mga salon staff mula sa kanilang natanggap na pamasko ay motorsiklo at aircon.

Mayroon ding nakapagpundar ng bahay at nakabakasyon.

Pero sabi ng mga senior stylist na sina Percy Gonzales at Marvin Quizon, pantulong din ito para sa kanilang mga pamilya.

"Nagpapasalamat kami kay mother kasi binigyan niya kami ng bonus nang ganoong kalaki kahit hindi naman namin agad-agad hinihingi sa kanya. Ang tingin niya kasi sa amin is parang kapatid, pamilya kami dito, walang away, walang gulo, walang sapawan tungkol sa clients," sabi ni Gonzales.

Dagdag naman ni Quizon: "Dito po nabibigay ni mother for free lahat ng mga pangangailangan namin kaya ‘yong binigay sa amin, tinulong din namin sa pamilya namin na mas kailangan nila e. Ikaw ba naman makatanggap ng 13th month pay nang mas maaga saka hindi mo expected na ganong kalaki, hindi ka ba gaganahan na magtrabaho nang mas mahusay?"

Ayon sa batas, dapat ibigay ang 13th month pay bago ang araw ng Pasko, Disyembre 25. 

Samantala, para sa mga micro and small enterprises o maliliit na negosyo, maaaring utangin sa Small Business Corporation ang pambayad ng 13th month pay para sa hanggang 40 empleyado.

 

Walang interes ang pautang na aabot sa P480,000 at magmumula sa Bayanihan 2. Maaari itong bayaran sa loob ng isang taon.

Bumisita lang sa website na bayanihancares.ph para sa mga detalye.

Sinabi ng SBCorp na abangan naman ang abiso para sa mga kompanyang nagbawas ng empleyado o pansamantalang napasara dahil sa pandemya.

- TeleRadyo 12 Nobyembre 2021