Mga dinadala sa ospital mula sa quarantine facility sa Tanza, Cavite dumarami

Nabawasan ang mga senior citizen na nagpapagaling sa COVID-19 isolation facility sa Tanza, Cavite pero ito ay dahil dumarami ang lumalala ang kondisyon at kinailangang ilipat sa ospital. 

Ayon sa St. Augustine COVID-19 isolation facility, nasa 11 na lang ang kanilang mga pasyente, matapos mapuno ang 30 kama ng pasilidad at maging ang kanilang observation room nitong mga nakaraang linggo. 

""Kapag mga O2-requiring na po talaga, mga oxygen-requiring, is kailangan nang ma-transfer sa hospital. Kapag dito po kasi, lalo na kapag senior citizen, mabilis lang pong mag-deteriorate 'yung lagay nila," ayon sa medical officer na si Dr. Princess Jara Imi Peregrino. 

Aabot sa higit 1,000 ang aktibong kaso ng COVID-19 sa Tanza. 

Bagama't wala pang kumpirmadong kaso ng Delta variant, napapansin ng municipal health office ang mabilis na pagdami ng mga nagkakasakit, ng mga nao-ospital, at ng mga namamatay. 

— Headline Pilipinas, 1 Setyembre 2021