5 ilegal na shuttle at colorum van, huli sa Laguna

Anjo Bagaoisan, ABS-CBN News

Posted at Sep 01 2021 06:56 AM

Watch more on iWantTFC

MAYNILA - Naaktuhang kulang sa papeles o sobra sa pasahero ang 4 na sasakyang inarkila bilang shuttle service sa 2 pangunahing kalsada sa Laguna Martes.

Huli rin bilang kolorum ang isang van dahil sa umano'y "ulo-ulo" na pagsingil nito.

Nagsagawa ng operasyon ang Inter-Agency Council for Traffic (i-ACT) sa Eton Exit ng South Luzon Expressway (SLEx) sa Sta. Rosa at Mamplasan Exit sa Biñan.

Responde ito sa mga sumbong sa kanila ng pagbiyahe sa lugar ng mga ilegal na sasakyan.

Nakita nilang lagpas kalahati ang mga sakay ng isang shuttle bus na pampribado ang ipinakitang OR-CR. Wala pa itong certificate of lease o patunay na inaarkila ito.

Kulang din ng contract of lease ang iba pang mga nahuling van.

Kailangan kompletong hawak ng shuttle ang kanilang contract of lease, passenger accident insurance, valid ID ng driver at may markings ng kompanya ang sasakyan.

Nadiskubre naman ang van na may binabayarang tig-100 piso ang mga pasahero.

Ayon naman sa mga sakay, ambagan ito para sa gasolina at toll fee, pero giit ng i-ACT maituturing na itong kolorum.

May babayarang multa na tig-P200,000 para matubos ang mga naka-impound na van at P1-milyon para sa bus.