Supermarket sa Antipolo nasunog; pinsala aabot sa P35 milyon

MAYNILA—Nasunog ang isang supermarket sa Circumferential Road, Barangay San Jose sa Antipolo City, Rizal nitong Miyerkoles.

Ayon kay Antipolo City fire marshal Gilbert Valdez, nag-umpisa ang sunog sa ikalawang palapag ng gusali alas-4 ng madaling-araw.

Mabilis na kumalat ang apoy sa ibang parte ng gusali hanggang umabot ito sa display area kung saan nakalagay ang mga ibinebentang produkto.

Inakyat sa ikaapat na alarm ang sunog alas-5 ng madaling-araw at patuloy na inaapula.

Walang nasugatan sa insidente pero tinatayang aabot sa P35 milyon ang halaga ng pinsala ng sunog.—Ulat ni Lyza Aquino, ABS-CBN News