Ayuda sa higit kalahati ng mga barangay sa Pasay, naibigay na

Anjo Bagaoisan, ABS-CBN News

Posted at Aug 19 2021 10:29 AM

Watch more on iWantTFC

MAYNILA - Lampas 50 porsiyento na ng mga barangay sa Pasay City ang nakapamigay na ng cash aid assistance para sa mga apektado ng ikatlong enhanced community quarantine sa Metro Manila.

Ayon sa Pasay City Public Information Office, naipamahagi na ang ayuda sa 111 sa 201 barangay sa lungsod nitong Huwebes.

Umabot na sa 69,542 head of household ang nabigyan o mahigit 200,000 indibidwal.

May nakatakdang pamamahagi din ng ayuda sa 25 barangay ngayong Miyerkoles.

Huling araw na nitong Huwebes ng pagbibigay ng ayuda sa libo-libong residente sa Barangay 183 sa Pasay na siyang pinakamalaking barangay sa lungsod.

Hinati sa 2 araw ang bigayan ng ayuda para sa mahigit 12,000 pamilya na nakalista sa barangay.

Nahahati ito sa 2 area—ang Villamor Airbase Elementary School (VABES) at ang barangay gym.

Alas-9 ng umaga ang simula ng pagbibigay ng ayuda, pero may dumating na sa VABES ng alas-4 ng madaling-araw pa lang. 

Kuwento nila, may mga trabaho pa sila o aasikasuhing negosyo ngayong araw kaya pumila na sila nang maaga.

Marami sa kanila gagamitin itong pambili ng pagkain o panustos sa negosyo.

"Pagkatapos nito, marami pa akong iintindihin sa bahay, saka maganda rin namang maaga para hindi magulo. Minsan kasi kapag may pila doon, may magulo, sabihin nakauna. May inaalagaan akong apo, tapos sa bahay, mayroon din akong konting tinda pandagdag sa puhunan namin," sabi ni Ma. Theresa Guce.

Bukod sa mga pipila rin para sa ayuda, may asikasuhin din ang iba, tulad ni Adrelaine Yamba na kukunin ang ayuda ng kanyang inang si Ma. Delia Jadap na namatay nitong Hunyo. 

"Sa mama ko pong namatay. May pangalan po siya diyan. Kinuha ko lang po ang requirements tapos ifo-follow-up ko sa kanila. Kahit papaano mayroon po. Pampuhunan ng isda," sabi ni Yamba.

Nananawagan naman ang dating golf caddy na si Melchor Luciano na makuha sana ang mga hindi pa rin natatanggap niyang dating ayuda sa ilalim ng SAP.

Nawala kasi ang trabaho niya sa Villamor golf course dahil sa pandemya.

"Dahil walang trabaho kasi naka-lockdown, sana naman itong inaasahan naming ayuda tulad nitong SAP, sana ibigay sa amin ito nang sa ganoon mayroon kaming panawid-gutom," sabi ni Luciano.

Pagpasok sa loob ng school compound, dumadaan sa validation ang mga pumila para malaman kung nasa listahan sila ng mabibigyan ngayong araw.

Para sa kaayusan, hinati batay sa unang letra ng apelyido ang schedule ng mga tatanggap.

Noong Miyerkoles, letrang A - C ang pumila sa VABES, habang M-R ang sa barangay gym. Ngayon naman, D-M ang sa VABES, at R-Z ang sa gym.

Pinaupo rin ang mga pila nang ayon sa kanilang apelyido.

Aabutin ng alas-6 ng gabi ang pamimigay ng ayuda.

Pinaalalahanan ang mga pumila na ihanda na agad ang papeles para mabilis ang pamamahagi.

Ayon kay Pasay City public information officer Jun Burgos, hihiling pa rin ang lungsod ng extension o pagpapalawig sa deadline ng bigayan ng ayuda, pero titiyakin nilang magawa ang lahat para matapos ito sa ibinigay na panahon.