PatrolPH

Libo-libong pamilya apektado ng baha sa Oriental Mindoro

ABS-CBN News

Posted at Jul 26 2021 12:09 PM | Updated as of Jul 26 2021 01:16 PM

Watch more on iWantTFC

MAYNILA (UPDATE) - Libo-libong pamilya ang apektado ng pagbaha sa 2 bayan sa Oriental Mindoro dahil sa ilang araw na pag-ulan.

Sa bayan ng Baco, umabot sa 9,378 pamilya ang naapektuhan ng baha na dala ng hanging habagat na pinalakas ng Bagyong Fabian, ayon kay Mayor Reynaldo Marco.

Nasa 1,134 pamilya sa 5 barangay naman ang itinuturing nilang "greatly affected" dahil sa napakataas na baha.

"'Yun ang isang problema namin dito dahil itong Baco ay catch basin po ito," ani Marco sa panayam sa Teleradyo Lunes.

Dagdag ng alkalde, magdedeklara nitong Lunes ang lokal na pamahalaan ng state of calamity para matulungan ang mga apektadong residente.

"Ngayon, kami ay magco-convene... upang makapag-declare ng state of calamity para sa ganun ay matugunan ang ating mga kabarangay," ani Marco.

Sa ngayon, unti-unti na aniyang humuhupa ang baha dahil sa pagganda ng panahon.

Watch more in iWantv or TFC.tv

Samantala, nasa 29 na barangay naman ang apektado sa baha sa bayan ng Naujan kung saan umabot sa bubong ng mga bahay ang lebel ng tubig.

"Madaming barangay ang binaha dahil simula nung Miyerkoles patuloy ang pag-ulan," ani Mayor Mark Marcos.

Nasa 5,868 pamilya ang apektado ng baha habang 203 pamilya naman ang inilikas. Abot sa 16 na bahay naman ang nasira dahil sa pagbaha sa Barangay Aurora at Del Pilar.

Ayon kay Marcos, posible ring magdeklara ang lokal na pamahalaan ng state of calamity.

Sa inisyal na assessment, nasa P35 milyon aniya ang pinsala sa agrikultura sa Naujan.

Watch more in iWantv or TFC.tv
Bisitahin ang Patrol.PH para sa iba pang mga balita.