PatrolPH

Nagpanggap na nurse timbog sa pagbebenta ng COVID-19 vaccines sa Pasay

ABS-CBN News

Posted at Jul 08 2021 06:34 AM | Updated as of Jul 08 2021 08:27 PM

Watch more on iWantTFC

Inaresto ng Pasay City Police Miyerkoles ng hapon ang isang 35-anyos na babae matapos umano niyang gamitin ang pangalan at ID ng isang nurse para makapagbenta ng bakuna kontra COVID-19.

Mismong ang totoong nurse na si Dayrelle Esteban, 35, ang nakipagkita at nagbisto sa suspek na si alyas Mich sa entrapment operation sa isang kainan sa Pasay City. 

 

Nag-abot si Esteban sa suspek ng P50,000 bilang downpayment sa bibilhin sanang mahigit 50 bakuna sa halagang P110,000 o nasa mahigit P2,000 kada bakuna.

Watch more in iWantv or TFC.tv

Ayon kay Esteban, mga bakuna ng Pfizer, AstraZeneca, at SinoVac ang alok ni Mich sa kanya at kailangan umano ang downpayment para mailabas ang stock.

Galing pa umano ang suplay sa isang private hospital sa Makati at isang government hospital sa Quezon City.

Noong weekend, may nag-message sa kanyang guwardiya ng security agency na nauna nang nakausap ng suspek.

Kuwento nito, nagpanggap si Mich na empleyado ng private hospital at ipinadala sa guwardiya ang kopya ng professional ID ni Esteban at ibang mga retrato bilang patunay na siya ito. 

Ginamit ng suspek ang kopya ng ID sa Facebook post ni Esteban noong nakaraang taon.

Nagpresenta si Esteban na magpanggap na staff ng kompanya ng guwardiya para siya ang makipagtransaksyon sa suspek.

Sa huli, wala ring nakuhang bakuna kay Mich, kaya hinala ng pulis, maaaring manloloko lang siya para may kitain.

Inaresto rin bilang posibleng kasabwat ang live-in partner ni Mich na si alyas Gelo, 28, pero giit nito hindi niya alam ang ginawa ng kinakasama.

Depensa ni Mich, ngayon lang niya ito sinubukang gawin dahil sa paghahanap ng paraang kumita.

Dati siyang kasambahay na 3 buwan nang nawalan ng trabaho. Wala ring trabaho si Gelo.

Mga kasong estafa o swindling at identity theft sa ilalim ng Cybercrime Prevention Act ang kahaharapin ni Mich.

Sa nakalipas na linggo nagpaalala ang Department of Health at ang pulisya sa publiko na huwag tangkilikin ang mga iligal na nagbebenta ng bakuna. — Anjo Bagaoisan, ABS-CBN News

Bisitahin ang Patrol.PH para sa iba pang mga balita.