Publiko pinaalalahanan: Rehistro muna bago bakuna

ABS-CBN News

Posted at May 19 2021 08:02 AM | Updated as of May 19 2021 01:53 PM

Watch more in iWantTFC

MAYNILA - Pinaalalahanan ang publiko na magparehistro muna bago pumunta sa vaccination centers matapos dagsain ang rollout ng Pfizer COVID-19 vaccine nitong linggo.

Muling hinihikayat ang mga Pilipino na kunin ang anumang available na bakuna kontra COVID-19 dahil lahat ito ay epektibo at aprubado ng Food and Drug Administration, ayon kay Dr. Gloria Balboa, director ng Metro Manila center for health development.

"Kahit ano pong bakuna ang nandyan 'yun po ang best na bakuna para sa atin po," aniya sa panayam sa ABS-CBN Teleradyo.

"'Wag po sila pumunta kung hindi pa sila naka-schedule kasi bawat vaccination center mayroong limit na pwedeng bakunahan for that day... Alam naman natin 'pag pila at di ma-maintain ang social distancing, malaki ang risk na naman na kakalat ang sakit."

Watch more in iWantv or TFC.tv

Ito rin ang paalala ni Parañaque Mayor Edwin Olivarez matapos pumunta ang ilang miyembro ng category A4 (essential workers) at A5 (indigent) sa vaccination sites nang ianunsiyo ang pagsisimula ng paggamit ng Pfizer vaccine.

Itinabi ang kalahati ng 9,000 na bakuna ng Pfizer para sa ikalawang dose ng mga nabakunahan nitong linggo, dagdag niya.

"Minsan ang nagwo-walk-in po category A4 at A5. Napakahigpit po natin kasi di pa naman ganun kadami ang vaccine natin," aniya sa Teleradyo.

Isasapinal ng Metro Manila Council bago mag-Lunes kung kailan bubuksan sa A4 category ang pagbabakuna, dagdag ni Olivarez.

Maaaring magparehistro online o sa kani-kanilang barangay, dagdag ni Balboa.