Ilang taxi driver nanawagan para sa mas malaking bawas-presyo ng produktong petrolyo

MAYNILA — Matapos ang implementasyon ng oil price rollback ngayong Mayo 17, nanawagan ang ilang taxi driver na lakihan ang bawas sa presyo ng produktong petrolyo.

Halos buong taon na raw silang isang kahig, isang tuka dahil sa sunod-sunod na oil price hike.

Madalas umano’y halos 24 oras na silang bumibiyahe subalit kulang pa ang kinikita para sa pangkain ng 3 beses ng kanilang pamilya.

• ALAMIN: Bawas-presyo sa petrolyo sa Mayo 17

Ngayong Martes, ipinatupad ang P0.40 na bawas sa kada litro ng gasolina, P3.10 sa kada litro ng diesel at P2.10 sa kada litro ng kerosene.

Pero ang hirit ng mga driver, napapansin nila na matapos ang rollback ay mas mataas naman ang itinataas ng presyo ng gasolina matapos ang isang linggo.

Noong nakaraang Linggo ay P4 ang fuel price hike. — Ulat ni Reiniel Pawid, ABS-CBN News