PatrolPH

Mga suspek sa pagpatay ng mamamahayag sa Samar hindi pa naaaresto

ABS-CBN News

Posted at Apr 08 2022 11:29 AM

Watch more on iWantTFC

MANILA – Hindi pa rin nadadakip ang mga suspek sa pagpatay sa mamamahayag na si Jesus “Jess” Malabanan ilang buwan matapos nitong barilin sa Calbayog City, Samar, sinabi ng kaniyang misis ngayong Biyernes.

Sa isang panayam sa TeleRadyo, sinabi ng biyudang si Mila Malabanan na may warrant para sa isa sa 2 gunmen, pero hindi pa ito naihahain ng mga pulis dahil wala ito sa kaniyang rehistradong address.

“Ang sabi ng isang pulis, medyo wala na po doon sa lugar, baka po ay lumabas na po ng Bisaya,” kuwento niya.

Patungkol niya sa isa pang suspek, "'Yung isa po ang hawak po ng isang pulitiko po." 

Hindi nagbigay ng iba pang detalye ang biyuda. 

Matatandaang binaril si Malabanan noong Disyembre habang nanonood ng TV sa kaniyang bahay sa Brgy. San Joaquin, Tinambacan District.

Dati siyang correspondent at stringer ng Manila Standard Today, Reuters, at Bandera. Kabilang siya sa mga nagtrabaho sa Reuters coverage sa drug war ni Pangulong Duterte, na nanalo ng Pulitzer Prize. 

Ayon kay Mila, sinabi ng testigo na tila matagal minanmanan ng mga suspek ang biktima.

“May witness naman po talagang nakita sila, personal po nakita sila, kasi nakamasid na pala dito sa tindahan, bumibili po ng beer at nagtatambay po diyan yung suspek na yan. So naano niya yung pangalan tsaka yung mukha po ng suspek,” aniya.

--TeleRadyo, 8 April 2022
 

Bisitahin ang Patrol.PH para sa iba pang mga balita.