PatrolPH

4 menor de edad na ginawang 'escort' nasagip, 'bugaw' timbog

ABS-CBN News

Posted at Feb 25 2021 07:48 PM | Updated as of Feb 26 2021 09:18 PM

Watch more on iWantTFC
4 menor de edad na ginawang 'escort' nasagip, 'bugaw' timbog 1
Timbog si alyas "Ski" matapos niya umanong ibugaw ang ilang kababaihan, kabilang na ang 4 na menor de edad sa Quezon City. Screengrab, ABS-CBN News footage

MAYNILA – Arestado ang isang "bugaw" matapos niya umanong ilako bilang "escorts" ang ilang kababaihan, kabilang ang 4 menor de edad sa Quezon City.

Hindi na nakapalag ang suspek na si alyas "Ski" nang arestuhin ng mga operatiba ng National Bureau of Investigation-Anti-Human Trafficking Division (NBI-AHTRAD) sa isang entrapment operation.

Ni-rescue ang mga kasama niyang babae, kabilang ang 4 na menor de edad. Pero giit niya, napag-utusan lang siya para i-escort ang mga babae. 

"Aminin ko po 'yang mga kabataan na 'yan, may tinitiran silang bahay tapos puro nagbebenta ng sarili nila. Niyaya po ako ng friend ko, pinapunta ako sa bahay na 'yon, tapos nangyari na 'to," paliwanag ng suspek.

Watch more in iWantv or TFC.tv

Natuklasang umalis sa kani-kanilang mga bahay ang mga babae dahil sa problema raw sa pamilya. Sinamantala raw ng isang sindikato ang sitwasyon at kinupkop ang mga babae, saka sila ibinugaw.

"Kahit kakakilala pa lang, 'yung mga kabataan natin agad nagtitiwala sa kapwa nila kabataan at hindi nila alam na bagong kaibigan nila ay konektado sa sindikato na kung saan ay binebenta sila," ani Janet Francisco, hepe ng NBI-AHTRAD.

Ayon sa NBI, dahil sa pandemya, online na ang pambubugaw ngayon, at nasa social media na raw ang karamihan ng transaksiyon. 

Pag makapili ng babae ang customer ay saka lang sila magkikita para magbayaran. 

Dinala na sa ligtas na lugar ang mga na-rescue na menor de edad. 

Kulong naman ang suspek sa kasong human trafficking at child abuse. 

Tuloy ang imbestigasyon ng NBI sa hinihinala nilang sindikatong kinabibilangan umano ng suspek. 

–Ulat ni Niko Baua, ABS-CBN News

Bisitahin ang Patrol.PH para sa iba pang mga balita.