PatrolPH

Mga manggagawa puwedeng dumeretso sa DOLE para sa application ng P5,000 ayuda

ABS-CBN News

Posted at Jan 26 2022 11:41 AM | Updated as of Jan 26 2022 10:13 PM

Watch more News on iWantTFC

MAYNILA—Puwedeng magpunta sa field at regional offices ng Department of Labor and Employment ang mga manggagawang hirap sa online application ng P5,000 one-time cash assistance.

Ayon kay Atty. Sarah Mirasol, director ng DOLE-NCR, maglalaan ng equipment ang ahensiya para makapag-apply online ang mga manggagawang natigil o nawalan ng trabaho dahil sa COVID-19 Alert Level 3.

"Tutulungan ho namin. Kami po ay maga-assist sa kanila para makapag-apply sila online," aniya sa panayam sa TeleRadyo Miyerkoles.

Sa Metro Manila, may field offices ang DOLE sa Quezon City, CAMANAVA, Caloocan, Pasig, Las Piñas at Maynila.

Nitong Lunes nag-umpisang tumanggap ng application ang DOLE online sa pamamagitan ng website na https://reports.dole.gov.ph

Ayon sa guidelines, puwedeng magsumite ng kaniya-kaniyang aplikasyon ang mga manggagawa pero hinihikayat ang mga employer na sila na ang gumawa nito para sa lahat ng empleyado.

Kung employer ang mag-a-apply, kailangan ng temporary o permanent closure report para na rin makita kung nagsara ang establisimyento habang umiiral ang Alert Level 3.

Kailangan din ng payroll, logbook, employment contract, cash vouchers, o kahit na anong listahan ng mga sinasahurang manggagawa.

Kung indibidwal naman ang pag-apply ng empleyado, kailangan ng government ID, company ID at proof of unemployment gaya ng notice of termination o closure.

"Lilinawin ko lang po, hindi po kasama 'yung mga nag-resign, kundi ito 'yung mga displaced, ito ay na-retrench o dahil sa pagkakasara ng kanilang kompanya dahil apektado po sa COVID-19. Ito ang mga temporary o permanent closure of establishments," ani Mirasol.

Bisitahin ang Patrol.PH para sa iba pang mga balita.