PatrolPH

Mga kaso ng COVID-19 sa Catanduanes tumaas muli

ABS-CBN News

Posted at Jan 21 2022 02:04 PM

Watch more News on iWantTFC

MAYNILA—Tumaas na naman ang bilang ng mga nagkakasakit ng COVID-19 sa Catanduanes, ayon sa kanilang provincial health officer.

"'Yung cases natin sa COVID, pataas din po. Ngayon po, meron tayong 139 active cases, which accounts 5 percent of the total confirmed cases," ani Dr. Hazel Palmes sa panayam sa TeleRadyo Biyernes.

Sa kabuuan, may 2,913 COVID-19 cases ang lalawigan, kabilang dito ang 2,650 recoveries at 127 fatalities.

Sabi ni Palmes, biglang dumami ang nahawaan ng COVID-19 sa Catanduanes nitong Enero. Sa huling linggo ng Disyembre, mayroon na lamang 6 na COVID-19 case ang lalawigan.

"In the first week of [January], tumaas na po siya agad-agad, from 6 to 52 cases. So, that is a 767-percent increase," aniya.

Walong kawani rin ng provincial hospital ang naka-quarantine matapos magpositibo sa COVID-19.

Sa kabila ng pagsipa ng COVID-19 cases, sabi ni Palmes ay patuloy ang bakunahan sa Catanduanes.

Nasa 70 porsiyento ng target population ng lalawigan aniya ang itinuturing na fully vaccinated. 

Bisitahin ang Patrol.PH para sa iba pang mga balita.