PatrolPH

KBYN: Iba't ibang laruan gawa sa mga patapong tsinelas

ABS-CBN News

Posted at Sep 04 2022 08:42 PM

Watch more on iWantTFC

Iba't ibang klase ng laruan ang nagagawa ng 35 taong gulang na si Elmer Padilla sa mga patapong tsinelas na kaniyang nakukuha sa Cavite.

"Nagsimula na po ako gumawa ng robot, nasa 9 years old na po ako. Nakapulot ako ng tsinelas sa ilog tapos nakaukit na po ako gamit ang iba't-ibang karakter," kuwento ni Padilla sa KBYN.

Natigil si Padilla sa paggawa ng robot pagtuntong niya ng high school sa kagustuhang pagtuunan ng pansin ang pag-aaral at ang paglalaro ng boxing na pangarap niya noon.

"Nagbabakasakali na makilala kahit papaano tulad nila Manny Pacquiao pero hindi tayo pinalad diyan," ani Padilla.

Dahil nasa puso na niya ang sining, nagbalik si Padilla sa paggawa ng mga laruan at ibinenta ito panregalo tuwing pasko.

Dito na unti-unting nagsimula ang kaniyang karera para kumita ng maganda.

"Bale, nakabenta ako noon ng tatlo. Isang dead pool, isang bumble bee at tsaka Philippines transformer. Bale, kumita ako noon ng 550 pesos 'yan 'yun," pagdedetalye ni Padilla.

Maraming kilalang personalidad na din ang lumapit sa kaniya dahil sa kaniyang obra gaya na lamang nina Vice Ganda, Daniel Padilla at Boy Abunda.

Ang mga hollywood stars na gumanap sa mga superhero characters na sina Chris Hemsworth at Mark Ruffalo ay binigyang-pugay rin ang mismong ang kaniyang mga obra.

Dahil sa kaniyang angking talento, naiimbitahan rin si Padilla para ibahagi ang kaniyang kwento sa mga paaralan.

Sa pamamagitan ng kaniyang talento, nakapagpundar na siya ng sarili niyang bahay.

Gaya ng nakararami, hindi siya nakaligtas sa epekto ng pandemya. Humina ang takbo ng kaniyang hanapbuhay.

"Kahit anong mangyari, itutuloy ko pa rin po kung ano nasimulan ko dahil ang dalawa ko pong anak ang nagiging inspirasyon ko sa buhay ko na maibigay ko sa kanila pangangailangan nila," ani Padilla.

Hindi man natin nakikita ang halaga ng sirang tsinelas, may pakinabang pa rin ito sa iba, lalong lalo na sa mga katulad ni Padilla na bumuo ng hanapbuhay mula sa mga basurang sandalyas.

RELATED LINKS:

Bisitahin ang Patrol.PH para sa iba pang mga balita.