Hidilyn Diaz nakamit ang unang Olympic gold para sa Pilipinas

ABS-CBN News

Posted at Jul 26 2021 09:59 PM

MAYNILA — Gumawa ng kasaysayan nitong Lunes ang atletang si Hidilyn Diaz matapos niyang masungkit ang kauna-unahang gintong medalya ng Pilipinas sa Olympics para sa weightlifting. 

Tinalo ni Diaz ang 8 ibang atleta para sa kategorya, kabilang ang world record holder na si Liao Qiuyun ng China.

Ito na ang ikalawang Olympic medal ni Diaz matapos ang kaniyang silver finish sa 2016 Olympics sa Brazil.

Halos 100 taon na mula nang lumahok ang Pilipinas sa Olympics pero ngayon lamang nakapag-uwi ng ginto ang isang atletang Pinoy. 

Sa award ceremony, kitang emosyonal si Diaz habang isinusuot ang gold medal sa sarili at pinatutugtog ang national anthem.

Todo puri naman ang mga Pinoy sa social media sa kahusayan ni Diaz.