Mga OFW sa Taiwan ibinulgar ang umano'y 'high remittance rate' scam

ABS-CBN News

Posted at Jan 10 2020 08:12 PM | Updated as of Jan 11 2020 07:23 PM

Watch more in iWant or TFC.tv

MAYNILA — Dinagsa ng mga overseas Filipino worker (OFW) ang mga tanggapan ng Manila Economic and Cultural Office (MECO) sa Taipei, Taichung, at Kaohsiung sa Taiwan upang ireklamo ang tinatawag nilang "high remittance rate" scam.

Ayon sa MECO-Taipei, hindi na maituturing na isang simpleng panloloko ang kaso kundi isa nang syndicated estafa at money laundering.

Dahil sa laki ng halaga ng salaping sangkot sa kaso na umaabot daw sa 100 million Taiwan dollars o katumbas ng P165 milyon, pumasok na rin ang anti-money laundering council ng Taiwan sa imbestigasyon.

"Nakikipag-cooperate kami sa local authorities at lahat naman po ng complaints nila ay tinutulungan namin sila na i-forward sa proper authorities ng Taiwan para maimbestigahan ang dapat imbestigahan," ani Sabrina Aaron, opisyal ng MECO-Taipei.

Ayon sa website ng Ministry of Justice ng Taiwan, mahigpit na ipinatutupad ang anti-money laundering law ng bansa alinsunod sa international law para matunton ang galaw ng remittances at hindi ito magamit sa illegal activities.

Nakausap ng ABS-CBN News ang ilan pang mga nagreklamo na sina alyas "Jessa" at "Meriam."
 
Si Jessa, humahagulgol na nakiusap na ibalik lang sa kaniya ang P300,000 ipinagkatiwala niya sa umano'y scammer na itinuring niyang matalik na kaibigan.

Paalala ng MECO, kailangan sundin ang batas na sa mga authorized
financial institutions lamang magpadala dahil sila lang ang may karapatang humawak ng remittance ng OFWs.

Giit ng MECO sa OFWs, ang limit ng bawat padala ay 30,000 Taiwan dollars o katumbas ng P50,000 at dapat ding maipaliwanag ang source ng funds kapag ito ay lagpas sa limit.

Nasa kamay na ng mga awtoridad ang kasong ito at dasal ng mga biktima ang agarang aksyon.

—Ulat ni Marie Yang, ABS-CBN News

Bisitahin ang Patrol.PH para sa iba pang mga balita.