PatrolPH

PSG chief inako ang responsibilidad sa pagbakuna nang walang abiso sa FDA

ABS-CBN News

Posted at Dec 30 2020 03:39 PM | Updated as of Dec 30 2020 07:20 PM

PSG chief inako ang responsibilidad sa pagbakuna nang walang abiso sa FDA 1
Illustration ng COVID-19 vaccine na kinuhanan noong Abril 10, 2020. Dado Ruvic, Reuters/File

MAYNILA — Inamin ngayong Miyerkoles ni Presidential Security Group (PSG) commander Brig. Gen. Jesus Durante na nagsarili ang kanilang grupo sa pagkuha at pagturok ng bakuna kontra COVID-19.

Sa panayam, sinabi ni Durante na inaako niya ang buong responsibilidad sa pagbakuna, na nangyari kahit walang awtorisasyon mula sa Food and Drug Administration (FDA).

Hindi kinumpirma o itinanggi ni Durante kung kasama siya sa mga binakunahan laban sa nakahahawang sakit, na nakapanghawa na sa higit 471,000 sa bansa.

Pero ayon kay Durante, mangilan-ngilan lang aniyang closed-in security personnel ng presidente ang tinurukan.

Watch more on iWantTFC

Nauna nang sinabi ni Durante na nagpabakuna ang PSG dahil tungkulin nilang protektahan si Pangulong Rodrigo Duterte mula sa lahat ng banta sa kaligtasan nito, kasama na ang COVID-19.

Ipinaliwanag ni Durante na mag-isang kumilos ang PSG at nag-research ng tungkol sa hindi niya tinukoy na brand ng bakuna.

Nauna nang iniulat na galing ang bakuna sa Sinopharm, isang pharmaceutical company na pag-aari ng gobyerno ng China. Sinabi rin ng Malacañang na donasyon lang ang mga bakuna.

Hindi umano alam ng Presidente at iba pang ahensiya ng gobyerno ang pagbabakuna, ani Durante.

"We didn’t ask permission. We just informed him about it after all the close-in personnel were vaccinated. He was surprised," aniya.

Wala umanong ibang interes ang PSG kundi gawin ang mandatong proteksiyunan ang Pangulo.

Tiniyak din ni Durante na walang pondo ng bayan na ginamit sa pagbabakuna.

Ayon kay Durante, ang unang dose ay ibinigay noong Setyembre at sinundan noong Oktubre.

Nagsariling turok umano ang mga taga-PSG at wala pa namang nararamdamang side effect ang mga nabakunahan.

Bukas naman daw ang PSG sa imbestigasyon ng FDA pero maaari aniyang igiit ng unit ang confidentiality dahil umano sa kanilang trabaho.

'Smuggled'

Inamin naman ni Defense Secretary Delfin Lorenzana na smuggled o ilegal na ipinasok sa bansa ang bakunang ginamit ng mga guwardiya ng pangulo.

"Yes it's smuggled. Kasi hindi authorized eh na pumasok dito. Only the government can authorize that through the FDA," ani Lorenzana.

Watch more on iWantTFC

Ayon kay Lorenzana, hindi pa niya inaalam kung sino ang nagbigay sa pamahalaan ng Pilipinas ng bakuna.

"I don’t know. Hindi ko tinatanong eh... Hindi naman sinasabi sa 'kin ni Durante," aniya.

Kahit ilegal ang paraan ng pagkakakuha ng bakuna, hindi nakikita ni Lorenzana na mapaparusahan ang PSG o ibang kawani ng gobyernong tumanggap ng bakuna.

"Explain lang talaga ng PSG kung bakit nila ginawa 'yon. Justified naman eh. Anyway, 'yong vaccine naman ay hindi fake, totoo naman," aniya.

Hindi rin naniniwala si Lorenzana na nakompromiso ang seguridad ng PSG o ng Pangulong Duterte sa paggamit ng bakunang hindi pa kompleto ang pag-aaral at papeles.

Iminungkahi rin ng kalihim na dapat bilisan na lang ng FDA ang pag-apruba sa bakuna. 

Para sa panig ng Bureau of Customs (BOC), sinabi ng tagapagsalita na si Vincent Philip Maronilla na iniimbestigahan nila kung ipinuslit nga ang Sinopharm vaccines.

Ayon kay Maronilla, inaalam nila kung paano nakapasok sa bansa ang mga bakuna dahil wala naman silang ano mang record mula sa airports o pantalan na may naipasok na bakuna sa bansa.

"Based on the record of the BOC, wala pong nagdeklara sa amin ng vaccines, wala pong importation," ani Maronilla.

Iniimbestigahan din aniya ng Customs kung saan itinago ang mga bakuna at kung sino ang mga sangkot sa pagpasok nito.

Samantala, inatasan na rin ni Justice Secretary Menardo Guevarra ang National Bureau of Investigation na imbestigahan ang pagkalat ng mga hindi awtorisadong bakuna sa Pilipinas.

— May ulat nina Karen Davila at Chiara Zambrano, ABS-CBN News

RELATED VIDEO:

Watch more on iWantTFC
Bisitahin ang Patrol.PH para sa iba pang mga balita.