PatrolPH

Duterte pinangalanan ang ilang mambabatas na posibleng dawit sa umano'y korapsyon

ABS-CBN News

Posted at Dec 29 2020 05:52 PM | Updated as of Dec 29 2020 07:42 PM

Duterte pinangalanan ang ilang mambabatas na posibleng dawit sa umano'y korapsyon 1
Nagbibigay ng talumpati si Pangulong Rodrigo Duterte sa Malacañang Golf (Malago) Clubhouse sa Malacañang Park, Maynila noong Nobyembre 14, 2020. King Rodriguez, Presidential Photo

(UPDATE) Tila nagbago ang isip ni Pangulong Rodrigo Duterte sa pagsasapubliko ng mga pangalan ng mga mambabatas na isinasangkot umano sa korupsiyon. 

Kung noon, sinabi ng pangulo na wala siyang hurisdiksiyon, inilantad niya gabi ng Lunes ang laman ng listahan mula sa imbestigasyon ng Presidential Anti-Corruption Commission (PACC).

Pero bumusina ang pangulo bago sila banggitin at sinabing wala pang matibay na ebidensiya laban sa mga mambabatas. 

"The public should be aware that there is no hard evidence, that’s one... This is not indictment, this is not to destroy you, but be careful," ani Duterte.

Una niyang binanggit si Occidental Mindoro Rep. Josephine Ramirez-Sato na sangkot umano sa ghost projects sa kanilang lugar.

"The alleged bagman is the district engineer. [Department of Public Works and Highways] Secretary Mark [Villar] issued an order for the transfer of the said district engineer but until now it has not been implemented due to the intervention of Congressman Sato," ani Duterte.

Sinagot naman ito ni Sato at iginiit na walang basehan ang paratang ng pangulo.

Naghamon pa ang mambabatas na imbestigahan ang mga dati at kasalukuyang proyekto sa kanilang probinsiya.

Kaalyado rin umano ni PACC Commissioner Greco Belgica ang isang politiko sa kanilang probinsiya, na posibleng makalaban niya sa darating na 2022 local elections.

"This is an old issue po that has been settled kaya nagtataka po ako kung bakit ganyan," sabi ni Sato sa TeleRadyo. 

"Kaya sabi ko, unfair naman po sa amin na inilabas po nila 'yan without the investigation. But in this particular case po, sa akin may investigation na po at may report na po," dagdag ng kongresista.

Watch more on iWantTFC

Isa pang pinangalanan ni Duterte ang dating kongresistang si Teddy Baguilat Jr., na tumatanggap umano ng kickback sa mga contractor sa construction projects.

Sa Twitter, sinabi ni Baguilat na wala siyang kaso at wala ring kinaharap na imbestigasyon.

Diversionary tactic lang din umano ito, at ang dapat imbestigahan ay ang pagpapabakuna ng Presidential Security Group, na isa umanong insidente ng high-level corruption.

Nasa listahan din ng pangulo si Northern Samar Rep. Paul Daza, na nakikialam umano sa proseso ng bidding sa kaniyang distrito.

Pero bumuwelta si Daza at sinabing hindi siya kinausap ng PACC para hingin man lang ang kaniyang panig.

Nakatitiyak din aniya siyang kaaway niya sa politika ang nagbigay ng aniya'y libelous information sa PACC.

Kasama rin si Bataan Rep. Geraldine Roman sa mga pinangalanan dahil humihingi umano siya ng 10 porsiyentong kickback sa bawat proyekto ng Department of Public Works and Highways sa kanilang lugar.

Sa Twitter, sinabi ni Roman na nagulat siya sa pagkakadawit pero ikinalulugod niyang nilinaw ng pangulo na wala pang matibay na ebidensiya laban sa kaniya.

Bukas din aniya siya sa ano mang imbestigasyon.

Samantala, tinukoy din na posibleng sangkot sa korupsiyon si Quezon City 5th District Rep. Alfred Vargas.

Tiwala naman umano si Vargas na malilinis ang kaniyang pangalan at handa rin siyang imbestigahan ng tamang awtoridad.

Maging ang kaalyado ng pangulo na si Rep. Eric Go-Yap ay pinangalanan din ng pangulo.

Nakialam umano si Yap sa imbestigasyon ng PACC at pinatanggal ang pangalan ng isang district engineer sa listahan ng mga dawit sa katiwalian.

Pinabulaan naman ni Yap na mayroon siyang inaarbor na kaso sa PACC. Handa rin aniya siyang magbitiw sa puwesto sakaling mapatunayan ang mga ipinupukol sa kaniya.

Nasa listahan din ng pangulo si Misamis Occidental Rep. Henry Oaminal, na tumanggi rin sa bintang ng korupsiyon.

Ayon kay Oaminal, ibinenta na niya ang shares sa construction company na binanggit ng pangulo bago pa siya pumasok sa politika noong 2017.

Kasama rin si Quezon Rep. Angelina Tan, na may kuwestiyonable umanong ipinagawang proyekto sa lalawigan.

Pero paliwanag ni Tan na malinis ang kaniyang konsensiya sa walang basehang bintang at handa rin siya sa ano mang imbestigasyon.

Watch more on iWantTFC

Pinangalanan din ni Duterte ang ilang district engineers na sangkot umano sa korupsiyon pero nilinaw na maituturing pa rin silang inosente hangga't wala pang ebidensiya.

"Now, I would like to ask Secretary Villar to give me the list of all district engineers and the districts they are assigned all over the country. I will reorganize the assignments. Iikutin ko kayong lahat," ani Duterte. 

Ayon kay Duterte, maging sa Philippine Health Insurance Corp. (PhilHealth), na nadawit din kamakailan sa isyu ng korupsiyon, ay magkakaroon ng balasahan.

Hindi na muna papangalanan sa ulat na ito ang iba pang nabanggit na kongresista habang wala pa silang tugon sa bintang. 

Ayon kay House Speaker Lord Allan Velasco, mahalagang mabigyan ng pagkakataong marinig ang panig ng mga isinasangkot na opisyal.

Naniniwala si Velasco na ang Ombudsman ang tamang humawak ng usapin, lalo't limitado lang ang hurisdiksiyon ng PACC.

Ayon naman kay Presidential Spokesperson Harry Roque, bahagi ng freedom of information ang paglalantad ng listahan.

Patuloy ang imbestigasyon ng isang task force hinggil sa kaliwa't kanang alegasyon ng korupsiyon.

Kasabay nito, hinihingi kamakailan lang ng bagong PhilHealth chief na si Dante Gierran ang courtesy resignation ng senior vice presidents ng ahensiya.

-- Ulat nina Joyce Balancio at Zandro Ochona, ABS-CBN News

RELATED VIDEO

Watch more on iWantTFC

Isa pang pinangalanan ni Duterte ang dating kongresistang si Teddy Baguilat Jr., na tumatanggap umano ng kickback sa mga contractor sa construction projects.

Sa Twitter, sinabi ni Baguilat na wala siyang kaso at wala ring kinaharap na imbestigasyon.

Diversionary tactic lang din umano ito, at ang dapat imbestigahan ay ang pagpapabakuna ng Presidential Security Group, na isa umanong insidente ng high-level corruption.

Watch more on iWantTFC

Nasa listahan din ng pangulo si Northern Samar Rep. Paul Daza, na nakikialam umano sa proseso ng bidding sa kaniyang distrito.

Pero bumuwelta si Daza at sinabing hindi siya kinausap ng PACC para hingin man lang ang kaniyang panig.

Nakatitiyak din aniya siyang kaaway niya sa politika ang nagbigay ng aniya'y libelous information sa PACC.

Kasama rin si Bataan Rep. Geraldine Roman sa mga pinangalanan dahil humihingi umano siya ng 10 porsiyentong kickback sa bawat proyekto ng Department of Public Works and Highways sa kanilang lugar.

Sa Twitter, sinabi ni Roman na nagulat siya sa pagkakadawit pero ikinalulugod niyang nilinaw ng pangulo na wala pang matibay na ebidensiya laban sa kaniya.

Bukas din aniya siya sa ano mang imbestigasyon.

Samantala, tinukoy din na posibleng sangkot sa korupsiyon si Quezon City 5th District Rep. Alfred Vargas.

Tiwala naman umano si Vargas na malilinis ang kaniyang pangalan at handa rin siyang imbestigahan ng tamang awtoridad.

Maging ang kaalyado ng pangulo na si Rep. Eric Go-Yap ay pinangalanan din ng pangulo.

Nakialam umano si Yap sa imbestigasyon ng PACC at pinatanggal ang pangalan ng isang district engineer sa listahan ng mga dawit sa katiwalian.

Pinabulaan naman ni Yap na mayroon siyang inaarbor na kaso sa PACC. Handa rin aniya siyang magbitiw sa puwesto sakaling mapatunayan ang mga ipinupukol sa kaniya.

Nasa listahan din ng pangulo si Misamis Occidental Rep. Henry Oaminal, na tumanggi rin sa bintang ng korupsiyon.

Ayon kay Oaminal, ibinenta na niya ang shares sa construction company na binanggit ng pangulo bago pa siya pumasok sa politika noong 2017.

Kasama rin si Quezon Rep. Angelina Tan, na may kuwestiyonable umanong ipinagawang proyekto sa lalawigan.

Pero paliwanag ni Tan na malinis ang kaniyang konsensiya sa walang basehang bintang at handa rin siya sa ano mang imbestigasyon.

Pinangalanan din ni Duterte ang ilang district engineers na sangkot umano sa korupsiyon pero nilinaw na maituturing pa rin silang inosente hangga't wala pang ebidensiya.

"Now, I would like to ask Secretary Villar to give me the list of all district engineers and the districts they are assigned all over the country. I will reorganize the assignments. Iikutin ko kayong lahat," ani Duterte. 

Ayon kay Duterte, maging sa Philippine Health Insurance Corp. (PhilHealth), na nadawit din kamakailan sa isyu ng korupsiyon, ay magkakaroon ng balasahan.

Hindi na muna papangalanan sa ulat na ito ang iba pang nabanggit na kongresista habang wala pa silang tugon sa bintang. 

Ayon kay House Speaker Lord Allan Velasco, mahalagang mabigyan ng pagkakataong marinig ang panig ng mga isinasangkot na opisyal.

Naniniwala si Velasco na ang Ombudsman ang tamang humawak ng usapin, lalo't limitado lang ang hurisdiksiyon ng PACC.

Ayon naman kay Presidential Spokesperson Harry Roque, bahagi ng freedom of information ang paglalantad ng listahan.

Patuloy ang imbestigasyon ng isang task force hinggil sa kaliwa't kanang alegasyon ng korupsiyon.

Kasabay nito, hinihingi kamakailan lang ng bagong PhilHealth chief na si Dante Gierran ang courtesy resignation ng senior vice presidents ng ahensiya.

-- Ulat nina Joyce Balancio at Zandro Ochona, ABS-CBN News

Bisitahin ang Patrol.PH para sa iba pang mga balita.