Banyaga patay, 7 iba pa sugatan sa salpukan ng kotse at taxi sa Parañaque

Anjo Bagaoisan, ABS-CBN News

Posted at Dec 29 2020 11:58 AM

MAYNILA - Hindi na umabot pang buhay sa ospital ang isang banyaga matapos salpukin ang sinasakyan niyang taxi ng isang kotse sa Dr. A. Santos Avenue sa Parañaque City, Martes ng madaling-araw.

Dead on arrival sa Ospital ng Parañaque and Swedish national na si Sven Erik Carsbrant dahil sa mga sugat sa katawan at pagkaipit sa taxi.

Sugatan din ang kasama niyang babae at ang driver ng sinakyan nilang taxi na si Romy Miñosa na nagtamo ng bali sa kanang braso at mga sugat sa tuhod.

Kuwento ni Miñosa, matagal na niyang suki ang pasaherong banyaga na sinusundo at hatid kung kailangan nito ng taxi.

Ayon sa police report, sumalpok sa taxi ang isang pulang kotse na biglang nag-counterflow sa Dr. A Santos Avenue sa Barangay BF Homes pasado hatinggabi.

Umikot ang taxi pagkabangga rito kaya natamaan din ang isang delivery truck sa likod nito na ikinasugat ng driver.

Sumampa ang kotse sa bakod sa sidewalk at nasugatan ang apat nitong pasahero na dinala sa iba’t-ibang mga ospital.

Sabi ni Miñosa, mabilis ang pagpapatakbo ng kotse bago ito tumama sa kanila. Dahil dito, desidido siyang ituloy ang kaso laban sa kabllang kampo.

RELATED VIDEO

Watch more on iWantTFC