ALAMIN: Presyuhan ng paputok sa Bulacan 3 araw bago mag-Bagong Taon

ABS-CBN News

Posted at Dec 29 2019 04:20 PM | Updated as of Dec 29 2019 08:15 PM

Watch more in iWantTFC

MAYNILA - Nagsimula nang tumaas ang presyo ng mga fireworks at firecrackers sa Bocaue, Bulacan ilang araw bago mag-Bagong Taon. 

Ayon sa mga vendor, nadagdagan nang 10 hanggang 20 porsiyento ang presyo ng kanilang mga paninda dahil sa mataas na demand. 

Presyo 

  • Kwitis → P4.50/piraso (dati: P3.50/piraso) 
  • Fountain → P50 hanggang P350 (dati: P30 hanggang P300)
  • Aerial fireworks → P700/piraso (dati: P600/piraso) 
  • Roman candle → P50/piraso (dati: P40/piraso) 
  • Luces → P50/piraso (dati: P40/piraso) 

Mabenta ang kwitis, luces, at aerial fireworks, ayon sa vendor na si James Mendoza. 

“Marami na pong bumibili. Tuwing hapon at gabi dumadagsa,” ani Mendoza

Kahit pa man mataas na ang presyo, dagsa pa rin ang mga kostumer na pawang galing sa Metro Manila at sa karatig-probinsiyang Pampanga at Cavite. 

Sa Bocaue rin namimili ng fireworks ang overseas Filipino worker na si Eric Mabale na galing pang Tondo sa Maynila. 

Umaabot sa P17,000 ang kaniyang nagastos sa pagbili ng mga paputok. 

“Tumaas siya nang konti, pero minsan lang din naman siya sa isang taon,” ani Mabale. 

"Suki na namin ito. Subok ko na siya. Kaya every year, dito ako bumibili,” dagdag niya. 

Inaasahan ng mga vendor ang pagdami pa ng mga mamimili hanggang Disyembre 31, sa bisperas ng Bagong Taon. -- Ulat ni Bianca Dava, ABS-CBN News

Bisitahin ang Patrol.PH para sa iba pang mga balita.