PatrolPH

Ilang pamilyang nasalanta ng Odette sa Surigao, ipinagdiwang ang Pasko

Anjo Bagaoisan, ABS-CBN News

Posted at Dec 25 2021 04:23 PM

Kahit walang kuryente, makain at maging matirhan, naghanap ng paraan ang ilang taga-Surigao City na magunita pa rin ang Pasko kahit nasalanta ng Bagyong Odette. Anjo Bagaoisan, ABS-CBN News
Kahit walang kuryente, makain at maging matirhan, naghanap ng paraan ang ilang taga-Surigao City na magunita pa rin ang Pasko kahit nasalanta ng Bagyong Odette. Anjo Bagaoisan, ABS-CBN News

SURIGAO CITY - Kahit walang kuryente, makain at maging matirhan, naghanap ng paraan ang maraming taga-rito na magunita pa rin ang Pasko matapos mabago ang kanilang mga buhay ng dumaang bagyong Odette. 

Kung 'di pa sa pangangaroling ng ilan niyang anak sa palengke at mga gasolinahan, baka walang naihaing espesyal sa Noche Buena si Maryveil Comodas, na may 11 anak. 

Lahat sila, nakasilong sa isang kuwarto sa C.V. Diez Memorial Central Elementary School kasama ang mahigit 100 pamilya. 

Sabi niya, namulot na lang sila ng pinansuot pagkatapos ng bagyo, at natulog kahit sa basang sahig. Inuubo na rin ang kaniyang mga anak. 

Nataon pa na Disyembre 24, bisperas ng Pasko, ang unang kaarawan ng kaniyang bunso. 

Ang mister niya, ginabi sa pagtatrabaho kaya nagpaalalay na lang sa anak sa paghahanda ng menu: pansit bihon na may sahog na corned beef. 

Maaga namang kumain ng hapunan ang pamilya ni Jolandy Silvosa, pastor na nagtuturo sa paaralan. Nabutas ang bubong ng kanilang bahay nang bumagyo, kaya hindi nila matutuloy ang taunang nakagawian na mag-Pasko sa bahay ng kamag-anak. 

Siya rin ang nag-aasikaso ng mga evacuee sa paaralan. 

"Masakit isipin na marami ang nawala sa akin. Halimbawa, itong bahay ko, natuklap ang ano niya. Pero okay lang dahil ang Panginoon ay laging and'yan naman. Alam naman Niya kung ano ang kinakailangan namin at binigay naman Niya," ani Silvosa. 

Nagpatuloy ang midnight mass na mas pinaaga, sa labas ng San Nicolas de Tolentino Cathedral, sa kabila ng naging pinsala sa simbahan. 

Sabi ng paring si Fr. Dennis Ilogon, sa panahong ito lalong dapat hindi bumitaw sa pananalig sa Diyos at dapat aniyang paghugutan ng pag-asa ang buhay ni Hesukristo na siyang ipinagdiriwang sa Pasko. 

"Siya mismo, nakaranas ng mga kahirapan kahit Diyos Siya. At ito siguro ang magiging inspirasyon nating lahat, lalong-lalo na sa araw-araw na bahagi ito ng ating buhay bilang Kristiyano. Kaya nga ang Pasko para sa akin ay hindi lang isang araw sa ating buhay," ani Ilogon. 

Dasal at pasasalamat naman ang bitbit ng mga nagsimba. 

Ang pinakamahalagang mensahe, ayon kay Ilogon: "Ipagpatuloy natin ‘yong itinuro sa atin ng Panginoon. Ibahagi natin ang pagmamahalan. Kasi ‘yong pagmamahalan, hindi ‘yan nawawala dahil sa mga kahirapan na nararanasan natin. Bagkus kailangan natin ipagpatuloy dahil ito’y nagbibigay sa atin ng lakas." 

KAUGNAY NA VIDEO

Watch more News on iWantTFC
Bisitahin ang Patrol.PH para sa iba pang mga balita.