PatrolPH

DOJ ipinauubaya na sa PNP imbestigasyon sa pamamaril sa 2 pulitiko sa Misamis Occidental

ABS-CBN News

Posted at Dec 23 2021 05:42 PM | Updated as of Dec 23 2021 09:55 PM

MAYNILA (UPDATE) - Nakahanda ang Department of Justice (DOJ) na atasan ang National Bureau of Investigation (NBI) na pumasok sa kaso ng pamamaril kina Mayor Michael Gutierrez ng bayan ng Lopez Jaena sa Misamis Occidental at dating Oroqueta Mayor Jason Almonte.

Sina Gutierrez at Almonte ay pinagbabaril at nagtamo ng tama ng bala sa ulo at batok nitong Miyerkoles ng gabi sa Barangay 7, Tangub City.

Pero sabi ni Justice Secretary Menardo Guevarra, ipinauubaya na muna nila sa Philippine National Police (PNP) ang imbestigasyon pero naka-standby pa rin naman aniya ang kanilang NBI field agents na pinakamalapit sa pinangyarihan ng insidente. 

“We’ll let the PNP do the initial investigation but I’ll ask the nearest NBI field agents to stand by and extend assistance if requested.” ani Guevarra

Sa pinakahuling impormasyon, hindi pa nagkakaroon ng malay si Mayor Gutierrez matapos sumailalim sa operasyon nitong Huwebes ng madaling araw sa Ozamiz City.

Sa inisyal na imbestigasyon ng Tangub City Police, nagtipon-tipon para sa isang Christmas party ang grupo ng mga politiko ng Misamis Occidental na kaalyado ni 2nd District Rep. Henry Oaminal na Team Asenso ng PDP-Laban.

Nagkakasiyahan sa pagbibigay ng kani-kanilang mensahe ang mga politiko nang bigla silang mabulabog nang umalingawngaw ang putok ng baril.

Unang tumama ang bala sa metal frame ng pinto bago tamaan sina Gutierrez at Almonte.

HOT PURSUIT

Patuloy pa ang imbestigasyon ng Tangub City Police para alamin ang tunay na motibo sa pamamaril at kung sino ang nasa likod nito.

Sa isang pahayag, sinabi ng Philippine National Police na naka-lockdown na ang Tangub para makatulong sa paghahanap ng mga suspek. May mga mobile checkpoints na rin na ipinakalat sa lugar.

"Police teams were formed to provide security to all three shooting victims while forensic investigators are now processing the crime scene," sabi ng PNP sa pahayag.

Kabilang si Gutierrez at Almonte sa listahan ni Pangulong Rodrigo Duterte ng mga umano'y narco-politicians. 

— Johnson Manabat, ABS-CBN News

BALIKAN

Watch more News on iWantTFC
Bisitahin ang Patrol.PH para sa iba pang mga balita.