PatrolPH

Bentahan ng paputok, binabantayan habang papalapit ang Bagong Taon

ABS-CBN News

Posted at Dec 23 2021 03:22 PM

Binabantayan na ng Philippine National Police (PNP) ang pagbebenta ng mga paputok ngayong nalalapit na ang pagsalubong sa Bagong Taon.

Inilabas na ng PNP ang listahan ng mga ipinagbabawal na paputok, kasama ang mga sumusunod:

  • Watusi
  • Piccolo
  • Poppop
  • Five-Star
  • Pla-Pla
  • Lolo Thunder
  • Giant Bawang
  • Giant Whistle Bomb
  • Atomic Bomb
  • Super Lolo
  • Atomic Triangle
  • Goodbye Bading
  • Large Size Judas Belt 
  • Goodbye Philippines
  • Goodbye De Lima
  • Bin Laden
  • Hello Columbia
  • Goodbye Napoles
  • Mother Rockets
  • Coke-In-Can
  • Super Yolanda
  • Pillbox
  • Boga
  • Kwitis
  • Kabasi

Bawal din umano ang mga sobrang laki at sobra sa timbang na mga firecracker at pyrotechnic device (FCPD), imported man o locally made, pati ang mga paputok na may ibang tatak o pangalan pero katumbas ng mga ipinagbabawal.

Sa Central Luzon, ipinaalala ng pulisya na mahigpit na ipinagbabawal at may parusa ang pagbebenta ng mga ilegal na paputok sa labas ng firecracker zones.

"Nagkaroon na kami ng initial meeting with the manufacturers, sellers association," sabi ni Central Luzon Police Director Brig. Gen. Matthew Baccay.

"Because of the pandemic, kailangan din nilang kumita on one hand. And on the other, gusto rin naming sundin nila 'yong mga allowable firecrackers and pyrotechnic within the limits provided by law," ani Baccay.

Sa Bocaue, Bulacan, back to normal na ang bentahan ng mga paputok at pailaw pero tumaas nang halos doble ang presyo ng mga ito.

Ayon sa Philippine Fireworks Association, kaunti ang supply ngayon dahil madami sa mga manufacturer ang nagbawas ng produksiyon.

"Ang presyo ng mga bilihin ng mga kemikal dumoble po so expect talaga prices of fireworks mas mataas talaga this year," sabi ni Philippine Fireworks Association President Joven Ong.

"Hindi aabutin siguro ng New Year, 'di na aabot ng December 31 ang stocks," ani Ong.

Marami rin sa mga tindahan ang ngayon lang ulit nagbukas matapos hindi magbenta noong 2020.

Noong Miyerkoles, nagsagawa ng monitoring ang Department of Trade and Industry sa Bocaue.

Tatlong notice of violation ang in-issue ng DTI dahil sa kawalan ng Philippine standard (PS) mark license. Nasa 573 na produkto ang nakumpiska, na aabot sa P26,340 ang halaga.

"Ito kaya 'yan may license, certified ng DTI. We test the fireworks," ani Trade Undersecretary Ruth Castelo.

Payo ng mga nagtitinda sa publiko na bumili ng mga paputok at pailaw nang maaga dahil tataas pa ang presyo ng mga ito habang papalapit ang Disyembre 31. Mainam din umanong hanapin ang PS mark sa mga produkto.

FROM THE ARCHIVES

Watch more News on iWantTFC
Bisitahin ang Patrol.PH para sa iba pang mga balita.