PatrolPH

4 patay sa engkwentro sa Taguig; higit P270-M halaga ng shabu nasabat

Anjo Bagaoisan, ABS-CBN News

Posted at Dec 22 2020 07:31 AM

MAYNILA - Patay ang 4 na drug suspek sa engkwentro sa pulisya sa C6 Road sa Bgy. Sta. Ana, Taguig City Lunes ng madaling-araw.

Ayon kay Taguig City Police chief PCOL Celso Rodriguez, nauwi sa putukan ang buy-bust operation na isinagawa ng Regional Intelligence Division ng National Capital Region Police Office (NCRPO) kasama ang PNP Drug Enforcement Group at Taguig City Police laban sa mga target na sina Christopher Ocarol alyas Riking at Allan Catalan.

Sabi ni Rodriguez, nagpaputok ang 4 na lalaki na lulan ng SUV habang patapos na ang transaksyon. 

Hindi pa nakikilala ang dalawa pang napatay nilang kasamahan.

Nasabat ang 40 Chinese tea packs na may tig-iisang kilo ng umano’y shabu.

Ayon sa pulis, aabot sa 40 kilos o halagang P272 milyon ang droga.

Nabawi rin ang 2 automatic rifle at tig-isang caliber .45 at caliber .38 na baril.

Sa police report, tinaguriang mga drug lord sa Central Visayas mula pa noong dekada 2000 sina Ocarol at Catalan na nakulong na sa New Bilibid Prison at Cebu City Jail pero na-dismiss ang mga kaso noong 2015.

Ayon sa pulisya, lumipat sina Ocarol at Catalan sa Metro Manila para tutukan ang mga aktibidad nila sa Visayas at nakakapagpadala ng aabot sa 50 kilos ng shabu mula Visayas pa-Luzon. 

Modus operandi umano nila ang iiwanan ang shabu sa isang sasakyan na ipaparada sa parking lot ng mall para puntahan na lang ng buyer. Bubuksan na lang ang sasakyan sa susing nakatago sa parte ng sasakyan. Idedeposito naman ang bayad sa kanila.

Galing pa ang supply sa isang miyembro ng tinaguriang Bilibid 14 na nakadetine sa Taguig ngayon.

Ayon kay Rodriguez, malaki ang epekto ng pagkakapatay sa 2 suspek sa transaksyon ng droga sa Metro Manila at Central Visayas.

Bisitahin ang Patrol.PH para sa iba pang mga balita.