PatrolPH

QC judge binansagang 'search warrant queen' matapos ang serye ng pag-aresto

ABS-CBN News

Posted at Dec 16 2020 04:34 PM


MAYNILA — Binansagan ng rights group bilang "search warrant queen" ang isang huwes ng Quezon City na nagbigay awtoridad sa mga pulis na maghalughog sa bahay ng mga aktibista, na kalaunan ay naaresto dahil umano sa pagtatago ng mga armas. 

Nitong Miyerkoles, lumusob ang iba't ibang grupo sa harap ng Quezon City Hall of Justice para kondenahin si QC Regional Trial Court Branch 89 executive judge Cecilyn Burgos-Villavert. 

Si Villavert ang nag-isyu ng search warrants laban sa 6 unyonista at 1 mamamahayag na inaresto noong nakaraang linggo kasabay ng International Human Rights Day. 

Bukod pa ito sa ibang search warrants na inisyu nya laban sa mga aktibista. 

Sabi ng Kilusang Mayo Uno (UNO), dapat ipa-disbar si Villavert. 

"Dapat itong ma-disbar, kasi sa pagkakaunawa po namin bilang judge, bago mag-issue ng search warrant or any warrant of arrest ay i-validate mo ang mga sinasampang mga reklamo," ani KMU secretary general Jerome Adonis.

Tingin nila, nakipagsabwatan si Villavert sa pulisya para sa umano'y crackdown laban sa mga kritiko ng pamahalaan. 

"Itong si Villavert ay nagpapagamit, alam niya na nagpapagamit siya dito kay Gen. Debold Sinas (PNP chief) at siyempre sa gobyerno ni [Rodrigo] Duterte para supilin kaming mga lider at aktibista," ani Adonis. 

Sinubukan ng ABS-CBN News na kuhanin ang panig ni Villavert pero di ito tumugon. Noong nakaraang taon, mismong si Chief Justice Diosdado Peralta ang nagsabing walang iregularidad sa ginawa ng hukom. 

Maaalalang sinabi na ng Makabayan bloc na dapat imbestigahan ng Korte Suprema si Villavert, na tila naging "pabrika" na umano ng mga search warrant laban sa mga aktibista. 


—Mula sa ulat ni Adrian Ayalin, ABS-CBN News


RELATED VIDEO: 

Watch more on iWantTFC
Bisitahin ang Patrol.PH para sa iba pang mga balita.