Hinihinalang biktima ng summary execution, natagpuan sa EDSA-Makati

Anjo Bagaoisan, ABS-CBN News

Posted at Dec 11 2020 08:18 AM

Watch more in iWantTFC

TeleRadyo

MAYNILA - Natagpuan sa gilid ng EDSA sa Barangay Magallanes, Makati ang bangkay ng isang lalaki na hinihinalang biktima ng summary execution o salvage Huwebes ng gabi.

Binalutan ng kulay asul na plastic bag ang sugatang biktima na nakasuot lang ng maong shorts.

May nakapulupot din sa leeg niya na electrical cord.

Gaya ng mga dating biktima ng salvage, may iniwang papel sa tabi ng bangkay na sinulatan ng “Snatser, magnanakaw, mandurukut ako, wag tularan.”

Walang pagkakakilanlan ang lalaki na tinatayang nasa edad 30-40.

Ayon kay Police Staff Sgt. John Patrick Balugod ng homicide section ng Makati Police, unang ipinaalam ng concerned citizens sa Pasay police ang bangkay na inakalang nakahiga lang sa may sidewalk sa EDSA northbound sa tapat ng kanto ng Evangelista.

Pero nang ipasa sa Makati police at dumating sa crime scene, wala nang nakitang mga witness.

Noong Dec. 4 naman, isang linggo ang nakararaan, natagpuan din ang 2 bangkay ng umano’y summary executions sa magkaibang bahagi ng Osmeña Highway sa Makati rin.

Nakagapos naman ng cable wire ang 2 lalaki na wala ring pagkakakilanlan noong unang imbestigahan.

Bisitahin ang Patrol.PH para sa iba pang mga balita.